Qazaqstan ulttyq quramasynyń 18 jastaǵy fýtbolshysy Dastan Sátbaev «Bernli» sapynda «Výlverhemptonǵa» qarsy kezdesýge qatysty. Buǵan deiin ol oiynshynyń quqyǵyna ielik etetin londondyq «Chelsi» klýbynyń shekteýine bailanysty bir matchti ótkizip alǵan edi, dep habarlaidy dalanews.kz.
Sátbaev negizgi quramǵa enbegenimen, matchtiń 61-minýtynda, esep 1:1 bolyp turǵan kezde alańǵa shyqty.
Qazaqstandyq fýtbolshy alańda 29 minýt ótkizdi. Flashscore portaly onyń oiynyn 6,4 balǵa baǵalady. Sátbaev qarsylas qaqpasyna soqqy jasamaǵanymen, toǵyz pas berip, barlyǵyn dál jetkizdi.
Kezdesýdiń 20-minýtynda Djeimi Vardi «Bernlidi» alǵa shyǵardy. Alaida 39-minýtta Fer Lopes esepti teńestirdi.
Al 71-minýtta Tavanda Chireva «Výlverhemptonnyń» jeńis golyn soqty. Osylaisha match 1:2 esebimen aiaqtaldy.
Bul «Bernlidiń» 11 matchtaǵy besinshi jeńilisi boldy. Komanda segiz upaimen 24 klýbtyń arasynda 21-orynda tur.
«Chelsi» Sátbaevtyń alańǵa shyǵýyna nege tyiym saldy?
Eske salaiyq, Dastan Sátbaev 2 qyrkúiekte «Midlsbroǵa» qarsy oiynda jaraqat alyp, bir aidan astam ýaqyt alańǵa shyǵa almaǵan edi.
Ol 10 qazanda «Ýotfordqa» qarsy ótken jeńisti kezdesýde oiynǵa qaita oraldy.
Alaida 13 qazanda «Charltonǵa» qarsy matchtiń ótinimine enbedi. Kezdesýden keiin «Bernlidiń» bas bapkeri Niki Haien «Chelsi» basshylyǵy Sátbaevty alańǵa shyǵarýǵa ruqsat bermegenin málimdedi.
«Bernli» kelesi kezdesýin 24 qazanda «Linkoln Sitige» qarsy ótkizedi. Match Qazaqstan ýaqytymen saǵat 19:00-de bastalady.
