Aqordada Qazaqstan Prezidenti Qasym-Jomart Toqaev pen Kambodja Koroldiginiń Premer-ministri Hýn Manettiń qatysýymen úkimetaralyq jáne vedomstvoaralyq qujattar almasý rásimi ótti. Eki el tsifrlandyrý, saýda, mádeniet jáne týrizm salalaryndaǵy yntymaqtastyqty damytýǵa baǵyttalǵan alty memorandým qabyldady, dep habarlaidy dalanews.kz Aqordaǵa silteme jasap.
Resmi málimetke sáikes, Qazaqstan men Kambodja arasynda mynadai qujattar rásimdeldi:
- Jasandy intellekt jáne tsifrlyq damý salasy. Qazaqstannyń Jasandy intellekt jáne tsifrlyq damý ministrligi men Kambodjanyń Poshta jáne telekommýnikatsiialar ministrligi arasynda ózara túsinistik týraly memorandým.
- Tsifrlyq úkimet jáne GovTech. Qazaqstannyń Jasandy intellekt jáne tsifrlyq damý ministrligi, «Ulttyq aqparattyq tehnologiialar» AQ jáne Kambodjanyń Ishki ister ministrligi arasynda tsifrlyq úkimet, GovTech jáne aqparattyq-kommýnikatsiialyq tehnologiialar salalaryndaǵy yntymaqtastyq týraly memorandým.
- Saýda-ekonomikalyq yntymaqtastyq. Qazaqstannyń Saýda jáne integratsiia ministrligi men Kambodjanyń Saýda ministrligi arasynda ózara túsinistik týraly memorandým.
- Mádeniet jáne óner. Qazaqstannyń Mádeniet jáne aqparat ministrligi men Kambodjanyń Mádeniet jáne kórkem óner ministrligi arasynda mádeniet pen óner salalaryndaǵy yntymaqtastyq týraly memorandým.
- Týrizm. Qazaqstannyń Týrizm jáne sport ministrligi men Kambodjanyń Týrizm ministrligi arasynda týrizm salasyndaǵy ózara túsinistik týraly memorandým.
- Qalalar arasyndaǵy bailanys. Qazaqstan astanasy Astana men Kambodja astanasy Pnompen arasynda baýyrlastyq bailanys ornatý týraly memorandým.
Qujattar eki el arasyndaǵy ekonomikalyq, tehnologiialyq jáne gýmanitarlyq bailanystardy keńeitýge baǵyttalǵan.
Aita keteiik, Kambodja Premer-ministri Hýn Manet Qazaqstanǵa resmi saparmen keldi. Buǵan deiin Qasym-Jomart Toqaev pen Hýn Manet shaǵyn quramda kelissóz júrgizip, saýda-ekonomikalyq qatynastardy nyǵaitý, energetika salasyndaǵy yqpaldastyqty keńeitý jáne tikelei áýe qatynasyn ashý múmkindigin talqylaǵan bolatyn.
