Qazaqstanda 2026 jylǵy qańtar-qyrkúiek ailarynda munai men gaz kondensatyn óndirý kólemi ótken jyldyń sáikes kezeńimen salystyrǵanda 8,3%-ǵa azaidy. Bul týraly Ulttyq statistika biýrosynyń derekterinde kórsetilgen, dep habarlaidy dalanews.kz.
Esepti kezeńde elde 69,351 mln tonna munai men gaz kondensaty óndirilgen. Qyrkúiek aiynda bul kórsetkish 7,663 mln tonnany qurady. Bul tamyz aiymen salystyrǵanda 9,6%-ǵa az.
Tabiǵi gaz óndirý de tómendegen. Qańtar-qyrkúiek ailarynda gaz óndirisi 46,6 mlrd tekshe metrge jetip, bir jylda 10,4%-ǵa qysqarǵan. Al qyrkúiek aiynda tabiǵi gaz óndirý kólemi tamyzben salystyrǵanda 26,8%-ǵa azaiyp, 4,3 mlrd tekshe metr boldy.
Sonymen qatar motor otynynyń keibir túrlerin óndirý artqan. Toǵyz aida Qazaqstanda 4,612 mln tonna benzin óndirildi. Bul ótken jyldyń sáikes kezeńimen salystyrǵanda 3,5%-ǵa kóp. Dizel otynynyń óndirisi 3,4%-ǵa ósip, 4,942 mln tonnaǵa jetti. Kerosin óndirisi 22%-ǵa artyp, 677 myń tonnany qurady.
Al mazýt óndirisi kerisinshe tómendegen. Qańtar-qyrkúiek ailarynda 1,053 mln tonna mazýt óndirilip, byltyrǵy sáikes kezeńmen salystyrǵanda 29,7%-ǵa azaiǵan.
