Túrkiia azamaty Amin Abdallah Húsein Qazaqstanda úsh avtokólik satyp alý úshin 90 million teńge tólep, sodan beri kólikterin de, aqshasyn da qaitara almai júrgenin málimdedi. Ol Jan Ahmadige bergen suhbatynda ózin aldady dep aiyptaǵan azamattyń jubaiy Respublica partiiasynyń filialyn basqaratynyn jáne kúieýiniń máselelerin yqpaldy adamdarǵa telefon shalý arqyly sheshýge tyrysatynyn aitty, dep habarlaidy dalanews.kz.
Onyń sózinshe, Aidyn Saltaq esimdi azamatpen ony Erkebulan esimdi tanysy bailanystyrǵan. Kelisim boiynsha oǵan bir Toyota Land Cruiser 300 jáne eki Toyota Camry avtokóligi jetkizilýge tiis bolǵan.
"Ony dosym Erkebulan arqyly tanydym. Ol maǵan Land Cruiser 300 jáne eki Toyota Camry kóligin satýdy usyndy. Osy usynys týraly dosymnan estip, 90 million teńge aldyn ala tólem jasadym. Bul 2025 jyldyń qarasha aiynda bolǵan. Sodan beri kólikterdi alǵan joqpyn", - dedi Amin Abdallah Húsein.
Suhbat keiipkeriniń aitýynsha, kólikterdi jetkizý merzimi birneshe ret keiinge shegerilgen. Ol úsh ai buryn quqyq qorǵaý organdaryna aryz túsirgenin jetkizdi.
"Ol kólikterdi birde bir aidan keiin, birde on kúnnen soń beremin dep ýáde etti. Aqyrynda úsh ai buryn onyń ústinen aryz jazdym", - dedi Túrkiia azamaty.
Videoda suhbattan keiin atalǵan is boiynsha aryzdanýshynyń bopsalaý kúdigimen ustalǵany da aitylady. Sondai-aq daýǵa qatysy bar adamnyń jubaiynyń saiasi partiiada qyzmet etetini jáne máseleni telefon qońyraýlary arqyly sheshýge yqpal jasaityny jóninde málimdeme aitylǵan.
Qazirgi ýaqytta suhbatta aty atalǵan azamattyń ustanymy, 90 million teńgeniń qandai qujat negizinde berilgeni jáne istiń quqyqtyq mártebesi belgisiz. Quqyq qorǵaý organdary da atalǵan jaǵdaiǵa qatysty ázirge resmi túsinikteme bergen joq.
