Qylmystyq ister jónindegi kassatsiialyq sot kontrabandalyq taýarlardyń qunyn óndirip alý máselesiniń durys sheshilmeýine bailanysty prokýratýra engizgen narazylyqty qanaǵattandyrdy, dep habarlaidy dalanews.kz.
2024 jyldyń qańtarynan tamyzyna deiin, sottalǵan on adam, aldyn ala sóz bailasý arqyly, adamdar tobymen áreket ete otyryp, Eýraziialyq ekonomikalyq odaqtyń kedendik shekarasy arqyly temeki ónimderin kedendik baqylaýdan jasyryp, birneshe ret ótkizgen. Taýardyń jalpy quny 7,3 mlrd teńgeni quraǵan.
Sot úkimimen kináli adamdar ekonomikalyq kontrabanda jasaǵany úshin sottalǵan. Alaida memleketke keltirilgen zalal óndirilmei qalǵan. Narazylyqty qaraý nátijesinde kassatsiialyq sot sottalǵandardan memleket kirisine 7,3 mlrd teńgeden astam qarajatty ortaq tártippen óndirip alý týraly sheshim qabyldady.
Osylaisha, qylmystyq áreketter nátijesinde alynǵan qarajattyń biýdjetke qaitarylýy qamtamasyz etildi.
