Qarjylyq monitoring agenttigi Bas prokýratýranyń úilestirýimen úlestik qurylysqa qatysý týraly jalǵan sharttar arqyly páterlerdi zańsyz iemdený deregi boiynsha qylmystyq isti tergeýdi aiaqtady, dep habarlaidy dalanews.kz.
"Tólendi" turǵyn úi-qurylys kooperativin basqarǵan A.B. 1,5 myń úleskerdiń 10 mlrd teńgesin jymqyrýdyń qylmystyq shemasyn uiymdastyrǵan. Osy qylmysy úshin ol 2016 jyly 8 jylǵa bas bostandyǵynan aiyrylǵan.
Keiin Astana qalasy ákimdiginiń qatysy bar turǵyn úilerdiń qurylysy aiaqtalǵan. Páterlerdiń bir bóligi kópbalaly otbasylarǵa, jetim balalarǵa, múgedektigi bar adamdarǵa jáne áleýmettik jaǵynan osal toptaǵy ózge de azamattarǵa berilýge tiis bolǵan.
Bas bostandyǵynan aiyrý oryndarynan bosap shyqqannan keiin A.B. sybailastarymen birge osy páterlerdi iemdenýdiń jańa ailasyn oilastyrǵan. Ol úshin shyn máninde úlesker bolmaǵan jáne páter satyp almaǵan azamattardyń atyna kooperativke jarna tóleý týraly jalǵan sharttar jasalyp, qujattar ótken kúnmen rásimdelgen. Osy jalǵan úleskerlerdiń atynan quqyq qorǵaý organdaryna alaiaqtyq jasalǵany týraly aryzdar berilgen. Sol aryzdardyń negizinde qylmystyq ister qozǵalyp, jalǵan úleskerler jábirlenýshi dep tanylǵan. Qylmystyq top sot sheshimderin paidalanyp, páterlerdi óz attaryna rásimdeýdi, keiin olardy ózge adamdarǵa satyp, túsken aqshany ózara bólisýdi kózdegen.
Tergeý barysynda qylmystyq áreketke 80-nen asa jalǵan úlesker tartylǵany anyqtaldy. Olardyń atyna 170 jyljymaityn múlik nysanyn rásimdeý josparlanǵan. Osylaisha, jalpy quny 4,4 mlrd teńgeden asatyn páterlerdi zańsyz iemdený áreketiniń joly kesildi.
Qylmystyq top músheleriniń árqaisyna naqty mindet júktelgen. Biri jalǵan úleskerlerdi taýyp, olardyń atyna jalǵan sharttar rásimdese, endi biri sol sharttardy ózge azamattarǵa satyp, qylmystyq ister júrgizilýine yqpal etken.
Qylmystyq top kooperativke jarna tóleý týraly jalǵan sharttardy azamattarǵa satqan. Sonyń saldarynan azamattarǵa 400 mln teńgeden asa shyǵyn kelgen.
QMA málimetinshe, bul iske politsiia qyzmetkerleriniń de qatysy bary anyqtalǵan. Laýazymdyq ókilettigin teris paidalaný jáne dáleldi burmalaý deregi boiynsha tergeý bastaldy. Is boiynsha 19 adam kúdikti dep tanylyp, olardyń toǵyzy qamaýǵa alyndy. Kúdiktilerdiń jalpy quny 250 mln teńgeden asatyn múlkine tyiym salyndy.
Tergeý aiaqtaldy. Taraptar is materialdarymen tanysýǵa kiristi.
