Qazaqstanda otbasynyń ál-aýqatyn baǵalaý kalkýliatory 16 qazan kúni eGov elektrondyq úkimet portalynda iske qosylady. Qural azamattarǵa otbasynyń qandai sanatqa jatatynyn jáne memlekettik qoldaýdyń qandai túrlerine úmitker bola alatynyn aldyn ala anyqtaýǵa múmkindik beredi, dep habarlaidy dalanews.kz.
Bul týraly Ortalyq kommýnikatsiialar qyzmetinde ótken brifingte Eńbek jáne halyqty áleýmettik qorǵaý ministri Asqarbek Ertaev málimdedi.
Ministrdiń aitýynsha, kalkýliator ázirlenip, tehnikalyq tekserýden ótken. Qyzmet eGov portalynda ǵana emes, eGov Mobile mobildi qosymshasynda da qoljetimdi bolady.
Eńbek jáne halyqty áleýmettik qorǵaý vitse-ministri Bahtiiar Jazyqpaevtyń sózinshe, azamattar qural arqyly óz otbasynyń jaǵdaiyn modeldep, esepke alynatyn kórsetkishter negizinde aldyn ala baǵalaý nátijesin kóre alady.
«Otbasy quramyn, aktivterin, kóliginiń bar-joǵyn jáne basqa da kórsetkishterdi engizip, óz jaǵdaiyńyzdy teksere alasyz. Muny jeke derekterdi jariialamai, jasyryn túrde jasaýǵa bolady», — dedi vitse-ministr.
Kalkýliator azamattarǵa memlekettik qoldaý alý múmkindigin aldyn ala baǵalaýǵa kómektesedi. Alaida onyń nátijesi memlekettik járdemaqy nemese ózge de kómek mindetti túrde taǵaiyndalady degendi bildirmeidi. Naqty sheshim tiisti talaptar men rásimderge sáikes qabyldanady.
