"Qazaqtelekom" AQ basqarma tóraǵasy Baǵdat Mýsin Qazaqstan men Ázerbaijan arasyndaǵy Transkaspii talshyqty-optikalyq bailanys jelisiniń iske qosylýyna qatysty pikir bildirdi. Ol tarihi jobany júzege asyrǵan mamandarǵa alǵys aityp, bul jetistiktiń el úshin mańyzyn atap ótti.
Qazaqstan Prezidenti Qasym-Jomart Toqaev pen Ázerbaijan basshysy Ilham Áliev Kaspii teńiziniń túbimen ótetin jańa halyqaralyq bailanys jelisin resmi túrde iske qosty.
Joba "Qazaqtelekom" jáne ázerbaijandyq AzerTelecom kompaniialarynyń birlesken jumysy nátijesinde júzege asyryldy. Kaspii teńiziniń túbimen 380 shaqyrym talshyqty-optikalyq kabel tóselip, eki memleket arasynda tikelei tsifrlyq bailanys ornatyldy.
Baǵdat Mýsin Instagram paraqshasynda jariialaǵan jazbasynda jańa infraqurylymnyń Qazaqstannyń halyqaralyq derekter tasymaly salasyndaǵy múmkindigin keńeitetinin jetkizdi.
"Qazaqstan úshin bul – Aziia men Eýropa arasyndaǵy mańyzdy tsifrlyq torapqa ainalý jolyndaǵy taǵy bir qadam. Jańa baǵyt halyqaralyq derekter tranzitin damytýǵa, elimizdegi Derekter ortalyqtary alqabyn (Data Center Valley) órkendetýge jáne iri tehnologiialyq kompaniialardy tartýǵa qosymsha múmkindikter ashady", – dep jazdy ol.
"Qazaqtelekom" basshysy jobanyń tabysty aiaqtalýy kóptegen mamannyń birneshe aiǵa sozylǵan eńbeginiń nátijesi ekenin erekshe atap ótti.
"Biraq men úshin bul joba, eń aldymen, adamdar týraly. Bizdiń injenerler, teńizshiler, súńgýirler, kabel tóseýshiler men ony iske asyrý jolynda ailap eńbek etken barsha jandar týraly. Ázerbaijandyq áriptesterimizge jáne "Qazaqtelekomnyń" búkil komandasyna alǵys aitamyn! Osy kabeldiń árbir shaqyrymynyń artynda sizderdiń orasan zor eńbekterińiz tur. Búgin biz ortaq jumysymyzdyń nátijesin kórip otyrmyz. Qoldan keldi", – dedi Baǵdat Mýsin.
Jańa jeli Qazaqstannyń Aziia men Eýropa arasyndaǵy tsifrlyq tranzittik ortalyq retindegi rólin nyǵaitýǵa, derekter ortalyqtaryn damytýǵa jáne halyqaralyq tehnologiialyq kompaniialardy tartýǵa múmkindik beredi.
