Aqordada Qazaqstanǵa resmi saparmen kelgen Kambodja Koroldiginiń Premer-ministri Hýn Manetti saltanatty qarsy alý rásimi ótti. Budan keiin Memleket basshysy Qasym-Jomart Toqaev pen Kambodja Úkimetiniń basshysy shaǵyn quramda kelissóz júrgizdi, dep habarlaidy dalanews.kz Aqordaǵa silteme jasap.
Saltanatty rásim barysynda eki eldiń basshylary resmi delegatsiia múshelerin tanystyrdy. Qurmet qaraýyly rotasynyń bastyǵy raport bergennen keiin Prezident orkestri Qazaqstan men Kambodjanyń memlekettik ánurandaryn oryndady.
Kelissóz barysynda Qasym-Jomart Toqaev Hýn Manettiń Qazaqstanǵa saparyn tarihi oqiǵa dep baǵalady. Prezidenttiń aitýynsha, buǵan deiin Kambodja premer-ministrleri Qazaqstanǵa resmi saparmen kelmegen.
– Saparyńyzdyń tarihi máni zor dep sanaimyn. Óitkeni buǵan deiin Kambodja premer-ministrleriniń Qazaqstanǵa joly túspegen. Al Sizdiń qazaq jerimen jeke bailanysyńyz bar. Ákeńiz 1982 jyly elimizge kelgen eken. Búgin ekijaqty qarym-qatynastyń aýqymdy máselelerin talqylaimyz, – dedi Memleket basshysy.
Prezident eki el arasyndaǵy týrizm men gýmanitarlyq bailanystardy damytýǵa erekshe nazar aýdardy.
– Qazaqstan halqynyń elińizge yqylasy erekshe. Kóptegen otandasymyz Kambodjaǵa baryp, onyń kórikti jerlerimen tanysqysy keledi. Elderimiz arasynda tikelei áýe qatynasyn ashý máselesin pysyqtaýymyz qajet. Sondai-aq gýmanitarlyq saladaǵy bailanystardy jandandyrǵanymyz jón, – dedi Qasym-Jomart Toqaev.
Memleket basshysy Qazaqstan men Kambodjanyń tabiǵi resýrstarǵa bai ekenin atap ótip, osy baǵyttaǵy yntymaqtastyqty keńeitýge múmkindik baryn jetkizdi. Sondai-aq taraptar saýda-ekonomikalyq qatynastardy nyǵaitý máselelerin talqylady.
Óz kezeginde Hýn Manet Qazaqstanǵa shaqyrǵany úshin alǵys aityp, eki el arasyndaǵy diplomatiialyq qarym-qatynastyń ornaǵanyna 30 jyldan asqanyn eske saldy.
Kambodja Premer-ministri energetika jáne tsifrlandyrý salalaryndaǵy yntymaqtastyqqa qyzyǵýshylyq bildirdi.
– Búgin energetika sektoryndaǵy yqpaldastyqty tereńdetý múmkindigi týyp otyr dep oilaimyn. Vedomstvolarymyzǵa ózara múddeli baǵyttardy anyqtaýdy tapsyra alamyz. Qazaqstan elektrondy úkimet boiynsha aitarlyqtai tabysqa qol jetkizdi ári ozyq ázirlemelerge ie. Bizdiń ministrlikterimiz osy salada tájiribe almasýǵa qyzyǵýshylyq tanytyp otyr, – dedi Hýn Manet.
Kezdesý qorytyndysynda taraptar saiasi dialogty damytý, saýda-ekonomikalyq bailanystardy keńeitý jáne halyqaralyq uiymdar aiasyndaǵy yntymaqtastyqty nyǵaitý máselelerin talqylady.
