Astanada qoǵamdyq orynda beitanys áieldiń sońynan qalmai, telefon nómirin talap etken er adam 10 táýlikke ákimshilik qamaýǵa alyndy, dep habarlaidy dalanews.kz sottyń baspasóz qyzmetine silteme jasap.
Sot málimetinshe, oqiǵa 12 qazanda tańǵy saǵat 08:10 shamasynda bolǵan. Mas kúide bolǵan er adam qoǵamdyq kólikten túsken beitanys áieldiń sońynan erip, jumys ornyna deiin barǵan.
Ol áielden qaita-qaita telefon nómirin talap etip, ádepsiz áreketter jasaǵan.
Astana qalasynyń ákimshilik quqyq buzýshylyqtar jónindegi mamandandyrylǵan aýdanaralyq soty atalǵan isti Ákimshilik quqyq buzýshylyq týraly kodekstiń 434-baby 1-bóligi, iaǵni usaq buzaqylyq boiynsha qarady.
Sot otyrysynda er adam óz kinásin moiyndaǵan. Onyń quqyq buzýshylyq jasaǵany is materialdarymen, túsiniktemelerimen, ákimshilik quqyq buzýshylyq týraly hattamamen, beinejazbalarmen jáne jábirlenýshiniń aryzymen rastalǵan.
Atalǵan bap boiynsha 20 ailyq eseptik kórsetkish mólsherinde aiyppul salý, 20-dan 60 saǵatqa deiin qoǵamdyq jumystarǵa tartý nemese 5-ten 10 táýlikke deiin ákimshilik qamaýǵa alý jazasy qarastyrylǵan.
Sot jaza taǵaiyndaý kezinde quqyq buzýshylyqtyń sipatyn, er adamnyń alkogoldik masań kúide bolǵanyn, áieldi uzaq ýaqyt ańdyǵanyn jáne onyń jeke basyna qol suǵylmaýshylyq quqyǵyn buzǵanyn eskergen.
Nátijesinde er adam usaq buzaqylyq jasaǵany úshin kináli dep tanylyp, 10 táýlikke ákimshilik qamaýǵa alyndy.
