Ýkrainadaǵy soǵysqa tartylǵan 11 qazaqstandyq soǵys aimaǵynan shyǵaryldy. Bul týraly olardyń elge oralýyna kómektesip júrgen advokat Meiirman Shekeev málimdedi, dep habarlaidy dalanews.kz.
Buǵan deiin zańger jeti qazaqstandyqtyń soǵys shebinen shyǵarylyp, Reseidiń Voronej qalasyna jetkizilgenin habarlaǵan bolatyn. Búgin ol soǵys aimaǵynan shyǵarylǵan azamattardyń sany 11-ge jetkenin málimdedi.
– Alla qalap, balalardyń qazirgi tańda jeteýi soǵys shebinen aldyrylyp, Voronejge jetkizildi. Alla qalasa, elge keler kún de alys emes siiaqty, – dep jazǵan edi advokat buǵan deiin.
Qazaqstandyqtardyń týystary bilikten kómek suraǵan
Eske salaiyq, 7 qazanda Ýkrainadaǵy soǵysqa tap bolǵan qazaqstandyqtardyń analary men jaqyndary Astanaǵa kelip, Syrtqy ister ministrligine júgingen.
Olardyń aitýynsha, er azamattar bastapqyda Reseige jumys isteý maqsatynda ketken. Alaida keiin áskeri qyzmetke tartylyp, Ýkrainadaǵy soǵys aimaǵyna jiberilgen.
Buǵan deiin qazaqstandyqtar birneshe beineúndeý jariialap, elge qaitarýǵa kómektesýdi suraǵan.
Olar Reseige kúzet agenttikterine, et kombinattary men qus fabrikalaryna jumysqa ornalasý úshin barǵandaryn aitqan. Alaida ózderiniń málimdeýinshe, eńbek sharttarynyń ornyna basqa qujattarǵa qol qoiyp, nátijesinde kelisimshart boiynsha áskeri qyzmetshi atanǵan.
Bastapqyda birge júrgen qazaqstandyqtardyń sany 15 bolǵan.
Qazaqstan Syrtqy ister ministrligi buǵan deiin azamattardy elge qaitarý máselesi boiynsha Resei tarapymen kelissóz júrgizilip jatqanyn málimdegen. Sondai-aq elge oralýdy qajet etetin qazaqstandyqtardyń tizimi jasaqtalyp jatqany aitylǵan.
Ázirge soǵys aimaǵynan shyǵarylǵan 11 azamattyń Qazaqstanǵa qashan oralatyny belgisiz.
