Aqtóbede qalalyq №3 emhananyń burynǵy bas dárigeri Jánbek Narmuhamedov alaiaqtyq jasaǵany úshin sottaldy. Ol is júzinde kórsetilmegen meditsinalyq qyzmetter úshin Áleýmettik meditsinalyq saqtandyrý qorynan (ÁMSQ) 53 million teńgeden astam qarajat alǵan, dep habarlaidy dalanews.kz «Diapazon» basylymyna silteme jasap.
Is materialdaryna sáikes, Jánbek Narmuhamedov «Medina Klinik» JShS meditsinalyq mekemesiniń iesi bolǵan. Atalǵan klinika tegin meditsinalyq kómektiń kepildik berilgen kólemi aiasynda Áleýmettik meditsinalyq saqtandyrý qorynan qarjy alyp otyrǵan.
Tergeý málimetinshe, dáriger klinikany týysynyń senimgerlik basqarýyna bergen. Keiin týysy men klinika direktorynyń tiisti máselelerden jetkilikti habardar emestigin paidalanyp, basqa meditsinalyq mekemelerdiń joldamasymen qyzmet alǵan patsientter týraly aqparatty zerttegen.
Osylaisha, ol ÁMSQ qarajatyn jymqyrýdyń jolyn oilastyrǵan. Atap aitqanda, DamuMed aqparattyq júiesine kórsetilmegen meditsinalyq qyzmetter týraly jalǵan málimetter engizgen. Sonyń negizinde qor klinikaǵa aqsha aýdaryp otyrǵan.
Tergeý dereginshe, osyndai zańsyz áreketter arqyly 53 million teńgeden astam qarajat jymqyrylǵan. Alynǵan aqshany aiyptalýshy jeke qajettilikterine jumsaǵan.
Sot barysynda Jánbek Narmuhamedov kinásin tolyq moiyndap, memleketke keltirilgen shyǵyndy túgel ótegen. Osydan keiin prokýratýramen protsestik kelisim jasasqan.
Sot úkimimen dárigerge shartty túrde 5 jyl bas bostandyǵynan aiyrý jazasy taǵaiyndaldy.
Ázirge sot úkimi zańdy kúshine engen joq.
Aita keteiik, Jánbek Narmuhamedov meditsina salasynda 40 jyldan astam eńbek etken. Onyń 14 jylyn Aqtóbedegi №3 qalalyq emhananyń bas dárigeri qyzmetinde ótkizgen.
Ol osy emhanada kóz mikrohirýrgiiasynyń ambýlatoriialyq ortalyǵyn ashqan. Sondai-aq koronavirýs pandemiiasy kezinde aýrýhanalarda oryn tapshylyǵy týyndaǵan tusta emhana bazasynda statsionar uiymdastyrý týraly sheshim qabyldaǵan.
Jánbek Narmuhamedov «Qurmet» ordenimen marapattalǵan.
