17 qazanda Qazaqstannyń basym bóliginde aýa raiy qubylmaly bolady. Kei óńirlerde jańbyr men qar jaýyp, kóktaiǵaq, tuman jáne shańdy daýyl kútiledi. Al Almaty men ońtústik-shyǵys oblystarda túnde úsik júredi, dep habarlaidy dalanews.kz Qazgidrometke silteme jasap.
Sinoptikterdiń boljamynsha, 17-18 qazanda Jetisý oblysynda soltústik-shyǵystan jel soǵady. Alakól kólderi aýdanynda jeldiń jyldamdyǵy 15-20 m/s, kei ýaqyttarda ekpini 23-28 m/s deiin jetedi. Sondai-aq 17-20 qazan aralyǵynda oblystyń shyǵysynda tótenshe órt qaýpi saqtalady. 17 qazanǵa qaraǵan túni óńirde 3-8 gradýs úsik kútiledi.
Almaty qalasynda 17 qazanǵa qaraǵan túni topyraq betinde 1-3 gradýs, al Almaty oblysynda aýa temperatýrasy 1-6 gradýs aiazǵa deiin tómendeýi múmkin.
Abai oblysynyń batysynda, soltústiginde jáne ortalyǵynda kúndiz jańbyr men qar jaýyp, kóktaiǵaq bolady. Túnde jáne tańerteń kei aýdandarda tuman túsedi. Jeldiń ekpini 15-20 m/s jetedi.
Shyǵys Qazaqstan oblysynyń soltústigi men shyǵysynda túnde qar jaýyp, kóktaiǵaq kútiledi. Kúndiz jańbyr aralas qar jaýýy múmkin. Oblystyń birqatar aýdanynda tuman túsip, jel 15-20 m/s deiin kúsheiedi.
Soltústik Qazaqstan oblysynda túnde jańbyr men qar jaýady. Ońtústik aýdandarda kóktaiǵaq, al batys, soltústik jáne ońtústik bólikterinde tuman kútiledi. Jeldiń jyldamdyǵy kei jerlerde 15-20 m/s jetedi.
Batys Qazaqstan oblysynyń batysynda, ońtústiginde jáne ortalyǵynda azdaǵan jańbyr jaýady. Kúndiz naizaǵai oinap, shańdy daýyl soǵýy múmkin. Jeldiń ekpini 15-20 m/s deiin kúsheiedi. Óńirdiń birqatar bóliginde joǵary órt qaýpi saqtalady.
Mańǵystaý jáne Atyraý oblystarynda shańdy daýyl kútiledi. Jeldiń jyldamdyǵy 15-20 m/s jetedi. Atyraý oblysynyń ońtústigi men shyǵysynda tótenshe órt qaýpi saqtalady.
Aqtóbe oblysynda kúndiz batys jáne ońtústik aýdandarda jeldiń ekpini 15 m/s bolady. Oblystyń batysynda, ońtústiginde jáne ortalyǵynda tótenshe órt qaýpi saqtalady.
Jambyl oblysynyń taýly aýdandarynda túnde jáne tańerteń tuman túsedi. Jeldiń jyldamdyǵy 15-20 m/s, kei ýaqytta ekpini 23-28 m/s jetedi. Túnde oblystyń batysy men shyǵysynda 2 gradýs úsik kútiledi.
Qyzylorda oblysynyń shyǵysy men ortalyǵynda kúndiz shańdy daýyl soǵady. Jeldiń ekpini 15-20 m/s jetedi. Oblystyń basym bóliginde tótenshe órt qaýpi saqtalady.
Túrkistan oblysynyń taýly aýdandarynda tuman túsedi. Túnde jáne tańerteń batys, taýly jáne taý bókterindegi aýdandarda jel 15-20 m/s deiin kúsheiedi. Shymkent qalasynda da túnde jeldiń ekpini 15-20 m/s bolady.
Qaraǵandy, Ulytaý, Aqmola jáne Qostanai oblystarynyń birqatar aýdandarynda túnde jáne tańerteń tuman kútiledi. Qaraǵandy oblysynyń batysynda, sondai-aq Ulytaý oblysynyń batysynda, ortalyǵynda jáne ońtústiginde tótenshe órt qaýpi saqtalady.
Pavlodar oblysynda tuman túsedi. Kúndiz oblystyń batysy men ońtústiginde jeldiń ekpini 15-20 m/s jetedi.
Qazgidromet turǵyndarǵa aýa raiynyń qolaisyzdyǵyna bailanysty saqtyq sharalaryn saqtaýǵa keńes beredi. Ásirese kóktaiǵaq, qatty jel men tuman kezinde jolda abai bolǵan jón.
