Qaraǵandyda kásiporynnyń 37 mln teńgeden astam qarajatyn jymqyrǵan bas býhgalter 7 jyl 6 aiǵa bas bostandyǵynan aiyryldy, dep habarlaidy dalanews.kz.
Qaraǵandy oblystyq sotynyń málimetinshe, áiel 2017–2022 jyldar aralyǵynda qyzmettik ókilettigin paidalanyp, kásiporynnyń aqshasyn iemdengen. Apelliatsiialyq alqasy qorǵaýshylardyń shaǵymdaryn qarap, birinshi satydaǵy sot úkimin ózgerissiz qaldyrdy.
Tergeý materialdaryna sáikes, býhgalter jumys kompiýterinde jalǵan elektrondyq bank úzindilerin jasap, qujattardan kontragentterdiń derekterin alyp tastaǵan. Ol aqshany azyq-túlik pen kompiýterlik qyzmetter úshin tólem retinde kórsetip, jalǵan jeke kásipkerler men seriktestikterdiń shottaryna aýdarǵan.
Keiin bul uiymdardyń ókilderi býhgalterdiń ótinishi boiynsha aqshany qolma-qol aqshaǵa ainaldyryp, kómekteri úshin 3 paiyzyn ustap qalǵan. Qalǵan somany áielge qaitaryp otyrǵan. Keltirilgen shyǵynnyń jalpy kólemi 37 mln 188 myń 646 teńgeni qurady.
Qazybek bi aýdandyq soty 2026 jylǵy 10 shildede áieldi asa iri mólsherde senip tapsyrylǵan múlikti qyzmet babyn paidalanyp iemdengeni úshin kináli dep tanyǵan.
Sot býhgalterdi ortasha qaýipsizdik mekemesinde jazasyn óteýge jiberip, bes jyl boiy býhgalterlik jáne uiymdardyń qarjysyn bólýge bailanysty qyzmetpen ainalysýǵa tyiym saldy. Jábirlenýshiniń azamattyq talaby tolyq qanaǵattandyrylyp, sottalǵan áielden keltirilgen shyǵyn óndiriletin boldy.
Úkim zańdy kúshine endi.
