Atyraý oblysyndaǵy Jangeldin aýylynda bolǵan qaiǵyly oqiǵadan keiin ońaltý kýrsynan ótip jatqan Aqbaian Muqanǵalievanyń týystary onyń bes balasynyń bolashaǵyna alańdap otyr. Jaqyndary áiel áreketke qabiletsiz dep tanylǵan jaǵdaida balalar burynǵy kúieýi Sultan Sársemálievtiń ata-anasynyń qamqorlyǵyna berilýi múmkin dep qaýiptenedi, dep habarlaidy Mgorod.kz.
Qazirgi ýaqytta Aqbaiannyń tórt balasy «Shańyraq» balalar aýylynda tárbielenip jatyr. Al kenje balasy sábiler úiine ornalastyrylǵan. Aqbaiannyń ózi týysynyń qolynda turyp, densaýlyǵyn qalpyna keltirý jumystaryn jalǵastyrýda.
Jaqynynyń aitýynsha, áiel kúndelikti turmystaǵy keibir sharýalardy ózdiginen atqara bastaǵan. Degenmen oǵan áli de uzaq ýaqyt emdelý jáne mamandardyń kómegi qajet.
«Ol ózine kútim jasai alady, úi sharýasyna kómektesedi. Usaq motorikany damytýǵa arnalǵan arnaiy sabaqtarǵa qatysyp júr. Bul jattyǵýlar midyń jumysyna, oilaý qabiletine jáne óz betinshe áreket etýine áser etedi. Aqbaianǵa birinshi toptaǵy múgedektik berilgen, zeinetaqy alady, biraq bul qarajat jetkiliksiz. Oǵan dementsiia diagnozy qoiylǵan. Kei jaǵdaida áli de kómek qajet. Balalaryn umytqan joq, olardy qatty jaqsy kóredi. Biz onyń balalarymen kezdesip turýyna jaǵdai jasaýǵa tyrysamyz», – deidi týysy.
Balalaryn qaiyn jurty alyp ketýi múmkin
Aqbaiannyń jaqyndaryn alańdatyp otyrǵan basty másele – bes balanyń aldaǵy taǵdyry. Olar áiel tolyq ońalyp, balalarymen qaita qaýyshady dep úmittenedi.
Alaida Aqbaian sot sheshimimen áreketke qabiletsiz dep tanylsa, balalardyń qamqorlyǵy burynǵy kúieýi Sultan Sársemálievtiń ata-anasyna berilýi múmkin dep qorqady.
Týystarynyń sózinshe, Aqbaian balalarymen aptasyna bir ret qana kezdese alady. Al Sultannyń ata-anasy juma saiyn balalarǵa baryp turady.
«Olar belgilengen ýaqyttan bir saǵat buryn kelip alady. Sonyń saldarynan biz balalarǵa árdaiym kire almai qalamyz. Aqbaian olarmen kezdesip qalady ma dep te alańdaimyz. Degenmen balalar bolǵan jaǵdaiǵa qaramastan atasy men ájesin jaqsy kóredi», – deidi týysy.
Aqbaian ata-anasy men baýyrlarynyń qaza tapqanyn bilmeidi
Jaqyndarynyń aitýynsha, Aqbaian áli kúnge deiin ata-anasy, aǵasy men ápkesiniń qaitys bolǵanynan habarsyz.
Ol keide Jangeldin aýylyna baryp, týǵan-týystarymen kezdeskisi keletinin aitady. Mundai sátterde jaqyndary onyń nazaryn balalaryna aýdarýǵa tyrysady.
Týystary qaiǵyly shyndyqty estý Aqbaiannyń densaýlyǵyna keri áser etýi múmkin dep qaýiptenedi.
Al burynǵy kúieýi týraly suramaidy. Onyń esinde tek ajyrasqandary qalǵan.
Jangeldindegi úidiń taǵdyry da sheshilmegen
Qaiǵyly oqiǵadan keiin Aqbaian ata-anasynan qalǵan úidiń jalǵyz murageri bolyp otyr.
Týystary bul baspanany satqysy keledi. Óitkeni otbasy músheleri qaza tapqan úide Aqbaian men balalarynyń turýyn qalamaidy.
Alaida murany rásimdeý úshin áielge ata-anasynyń qaitys bolǵanyn aitý qajettigi týyndaǵan.
«Bizdiń jalǵyz tilegimiz – balalardyń anasymen birge ómir súrýi. Ol úide olar tura almaidy. Biraq úidi satý úshin aldymen murany Aqbaiannyń atyna rásimdeý kerek. Ol úshin bolǵan jaǵdaidyń bárin aitýǵa týra keledi. Biz onyń densaýlyǵyna qatty alańdaimyz. Ol endi ǵana ońala bastady. Mundai habar oǵan aýyr soqqy bolýy múmkin», – deidi jaqyny.
Aqbaiannyń týystary halyqtan kómek surady
Qazir Aqbaiannyń densaýlyǵyn qalpyna keltirý úshin psihologtar men psihoterapevterdiń kómegi qajet. Otbasy aqyly mamandarǵa júginip júrgenimen, emdeý shyǵyndary aitarlyqtai qarjylyq qiyndyq týǵyzǵan.
Sondyqtan jaqyndary qazaqstandyqtardan materialdyq qoldaý surap otyr.
Olardyń basty maqsaty – Aqbaiannyń densaýlyǵyn jaqsartyp, ózdiginen ómir súrýine múmkindik jasaý jáne bolashaqta bes balasymen qaita qaýyshýyna jaǵdai týǵyzý.
Aita keteiik, Jangeldindegi rezonansty qylmys boiynsha Aqbaiannyń burynǵy kúieýi Sultan Sársemáliev onyń ata-anasy, aǵasy men ápkesin óltirgeni úshin sottalǵan.
Balalardy basqa adamdardyń qamqorlyǵyna berý týraly túpkilikti sheshim qabyldanǵany jóninde aqparat joq. Ázirge bul – Aqbaiannyń týystary bildirgen alańdaýshylyq.
