Qyzylordada bes ailyq balany qaǵyp óltirip, oqiǵa ornynan qashyp ketken júrgizýshi úsh táýlikten beri ustalmaǵan. Qaza bolǵan sábidiń naǵashysy, karateden álem chempiony Móldir Jańbyrbai kúdiktini taýyp, jaýapqa tartýdy talap etti, dep habarlaidy dalanews.kz.
Buǵan deiin 13 qazanda Mitsubishi Lancer kóliginiń júrgizýshisi qolarbadaǵy balasymen kele jatqan 26 jastaǵy áieldi qaǵyp, oqiǵa ornynan ketip qalǵany habarlanǵan. Saldarynan bes ailyq sábi aýrýhanada kóz jumdy, al anasynyń jaǵdaiy óte aýyr.
Móldir Jańbyrbaidyń aitýynsha, onyń kelini Shanhai shaǵynaýdanyndaǵy Kúlteginov kóshesimen balasyn serýendetip júrgen. Sportshynyń sózinshe, bul jerde tolyqqandy jaiaý júrginshiler joly bolmaǵandyqtan, áiel jol jiegimen júrýge májbúr bolǵan.
Onyń aitýynsha, kólik joǵary jyldamdyqpen qarsy baǵytqa shyǵyp, áiel men qolarbany qaǵyp ketken.
«Kelinimniń jaraqaty óte kóp. Sol jaq denesiniń buǵana tusynan bastap ókshesine deiin súiekteri synǵan. Jambas súiekteri men bas súiegi zaqymdanǵan, qan quiylǵan. Dárigerler onyń jaǵdaiyn óte aýyr dep baǵalap otyr», – dedi Móldir Jańbyrbai.
Sportshynyń sózinshe, otbasy júrgizýshini izdeý jumystarynyń sozylyp ketkenine alańdaidy. Onyń aitýynsha, jol apatynan beri úsh táýlikke jýyq ýaqyt ótse de, kúdikti áli ustalmaǵan.
Jańbyrbai júrgizýshiniń kólikti áieliniń atyna tirkelgen avtokólikpen basqarǵanyn, al óziniń júrgizýshi kýáliginen aiyrylǵanyn aitty. Sondai-aq otbasy onyń buǵan deiin de basqa jol apattaryna qatysy bolýy múmkin ekenin estigen. Alaida bul aqparat ázirge resmi túrde rastalmaǵan.
«Onyń kim ekeni anyqtalǵan, áieliniń de, ata-anasynyń da mekenjailary belgili. Beinebaqylaý kameralaryndaǵy jazbalar da bar. Biraq eshqandai aqparat joq. Biz ózimiz qaita-qaita qońyraý shalyp, jaǵdaidy bilýge májbúrmiz», – dedi ol.
Marqumnyń týystary kúdikti boi tasalap, jaýapkershilikten jaltaryp ketýi múmkin dep qaýiptenedi. Olar júrgizýshini taýyp, isti obektivti tergeýdi talap etip otyr.
Buǵan deiin Qyzylorda oblysynyń politsiia departamenti adam ólimine ákelgen jol-kólik oqiǵasy jáne oqiǵa ornynan ketip qalý faktileri boiynsha qylmystyq ister qozǵalǵanyn habarlaǵan. Politsiia kúdiktiniń jeke basyn anyqtap, qala shyǵa beristerindegi baqylaýdy kúsheitken.
