AQSh pen Ýkraina arasyndaǵy kelispeýshilik Kievtiń Reseidegi munai óńdeý zaýyttaryna jasaǵan soqqylaryn qaita bastaýy jáne áskeri spýtniktik bailanysqa qoiylǵan shekteýlerden keiin kúsheidi, dep habarlaidy dalanews.kz.
AQSh prezidenti Donald Tramp 11 qazanda Resei men Ýkraina energetikalyq nysandarǵa shabýyl jasaýdy toqtatýǵa keliskenin málimdegen. Alaida Kiev bul bastamany Máskeý oryndamady dep esepteidi. Ýkraina prezidenti Vladimir Zelenskii Resei ýkrainalyq energetikalyq infraqurylymǵa soqqy berýdi jalǵastyrǵandyqtan, Kiev te Reseidiń munai óńdeý nysandaryna shabýyl jasaýdy qaita bastaitynyn aitty.
15 qazanda Ýkraina drondary Máskeýden ońtústik-shyǵysqa qarai shamamen 180 shaqyrym jerde ornalasqan Riazan oblysyndaǵy munai óńdeý zaýytyna soqqy jasady. Resei biligi nysan aýmaǵynda órt shyqqanyn habarlady. Tramp Ýkraina áreketin synap, mundai shabýyldar álemdik munai baǵasynyń ósýine yqpal etetinin málimdedi.
Qaishylyqty kúsheitken taǵy bir másele – Ýkraina áskeri paidalanatyn Starlink jáne AQSh úkimetine tiesili Starshield spýtniktik bailanys júieleriniń jumysyna qoiylǵan ýaqytsha shekteýler. Reuters agenttiginiń dereginshe, Starshield júiesine qatysty shekteý engizý týraly nusqaý Aq úiden Pentagon basshylyǵyna berilgen. Alaida AQSh-tyń joǵary laýazymdy ókili Tramptyń mundai tapsyrma bermegenin aitqan.
Zelenskii AQSh prezidentiniń Máskeýmen kelisimderine jáne spýtniktik bailanysqa qoiylǵan shekteýlerge narazylyǵyn bildirip, Vashingtonnyń qoldaýyna qatysty alańdaýshylyq bildirdi. Osy jaǵdai aiasynda Ýkraina basshysy Eýropalyq odaq jetekshilerimen kezdesip, Kievke qosymsha kómek kórsetý máselesin talqylaý úshin Briýsselge bardy.
