Qazaqstanda balasy 1,5 jasqa tolmai jumysqa shyqqan áielderdiń bala kútimine bailanysty áleýmettik tólemi saqtalady. Sonymen qatar bala týýyna bailanysty biýdjetten tólenetin járdemaqylardy taǵaiyndaý kezinde otbasynyń ál-aýqat deńgeii eskeriledi, dep habarlaidy dalanews.kz.
Bul týraly Eńbek jáne halyqty áleýmettik qorǵaý ministri Asqarbek Ertaev Ortalyq kommýnikatsiialar qyzmetinde ótken baspasóz máslihatynda málimdedi.
Ministrdiń aitýynsha, áleýmettik saqtandyrý júiesine keminde eki jyl qatysqan áielderge Memlekettik áleýmettik saqtandyrý qorynan tólenetin bala kútimine bailanysty áleýmettik tólem otbasynyń ál-aýqat sanatyna qaramastan saqtalady.
Al respýblikalyq biýdjet esebinen beriletin járdemaqylardy taǵaiyndaý tártibi ózgeredi. Atap aitqanda, jumys istemeitin áielderge tólenetin bala týýyna bailanysty birjolǵy járdemaqy men bala 1,5 jasqa tolǵanǵa deiingi ai saiynǵy járdemaqy otbasynyń muqtajdyq deńgeiine qarai taǵaiyndalady.
"Jumys istemeitin áielderge beriletin eki tólem de respýblikalyq biýdjetten qarjylandyrylady. Bul – bala týýyna bailanysty birjolǵy járdemaqy jáne bala 1,5 jasqa tolǵansha beriletin ai saiynǵy járdemaqy. Eki tólem de muqtajdyq deńgeiine orai taǵaiyndalady. A jáne V sanattaryndaǵy otbasylarǵa atalǵan járdemaqylar taǵaiyndalmaidy. S, D jáne E sanattaryndaǵy otbasylardyń tólemderdi alý quqyǵy saqtalady", – dedi ministr.
Jumysqa erte shyqqan analardyń tólemi saqtalady
Asqarbek Ertaev áielderdiń eńbek naryǵyna qaita oralýyna kedergi keltiretin taǵy bir shekteýdiń alynyp tastalǵanyn aitty.
Buǵan deiin áiel bala kútimi demalysyn aiaqtap, balasy 1,5 jasqa tolmai jumysqa shyqqan jaǵdaida áleýmettik tólem toqtatylatyn. Endi mundai jaǵdaida tólem belgilengen merzim aiaqtalǵanǵa deiin jalǵasady.
"Endi áielge jumysqa oralý men áleýmettik tólemdi saqtap qalýdyń birin tańdaýdyń qajettiligi bolmaidy. Júktilikke jáne bosanýǵa bailanysty tólem otbasynyń sanatyna qaramastan burynǵy tártippen saqtalady", – dedi Asqarbek Ertaev.
Osylaisha, áleýmettik saqtandyrý júiesine qatysqan jumys isteitin analardyń tólemderi otbasynyń ál-aýqat deńgeiine táýeldi bolmaidy. Al biýdjetten qarjylandyrylatyn járdemaqylardy taǵaiyndaýda otbasynyń áleýmettik jaǵdaiy eskeriledi.
