Páter men kólik otbasyny memlekettik járdemaqydan aiyra ma? Qazir qoǵamda kóp talqylanyp jatqan taqyryp — osy. Nege? Sebebi Eńbek ministrligi halyqqa áleýmettik qoldaý kórsetý júiesine ózgeris engizgeli jatyr. "Qarjylyq saýat" sarapshylary taldaý jasady, dep habarlaidy dalanews.kz.
Qazir qalai edi? Otbasy nemese onyń bir múshesi qandai da bir áleýmettik sanatqa jata ma — memlekettik járdemaqy taǵaiyndala beredi. Ministrlik ol erejeni ózgertý kerek deidi. Óitkeni ol tásil barlyq otbasynyń turmys deńgeiindegi aiyrmashylyqtardy tolyq eskere bermeidi. Jańa ózgeris memlekettik kómekti shyn máninde muqtaj adamdarǵa naqty baǵyttaýdy kózdeidi eken.
Ol qalai iske asady?
Eńbek ministrligi Qazaqstandaǵy ár otbasynyń áleýmettik ál-aýqatyn anyqtaidy. Ol úshin memlekettik aqparattyq júielerdegi málimetterge súienbek. Sol arqyly otbasynyń materialdyq jaǵdaiy men áleýmettik turaqtylyǵy jan-jaqty baǵalanady.
Otbasynyń qarjylyq jaǵdaiy qalai? Otbasy músheleri jumyspen qamtylǵan ba? Jyljymaityn múlki, kóligi, jer ýchaskesi, biznesi bar ma? Qarjy uiymdary aldynda mindettemeleri (nesiesi ǵoi) bar? Otbasy quramy, músheleriniń jas deńgeii jáne basqa da áleýmettik erekshelikter — bári eskerilmek.
Endi sanatqa bólinemiz
Iá. Qazirdiń ózinde jurt «Sen qai sanatqa jatasyń?» dep bir-birinen surai bastady. Jańalyqtyń shet jaǵasyn estip qalǵan kei aǵaiyn «kóligi, úii barlar úkimetten eshteńe almaidy» dep kesip aityp júr. Ásilinde, olai emes.
Túsindireiik. Otbasylar áleýmettik ál-aýqatyna qarai bes sanatqa bólinedi:
- A sanaty — ál-aýqaty joǵary deńgei;
- V sanaty — aýqatty deńgei;
- S sanaty — jaǵdaiy qanaǵattanarlyq deńgei;
- D sanaty — ekonomikalyq turǵydan osal deńgei;
- E sanaty — ekonomikalyq jáne áleýmettik turǵydan osal deńgei.
Iaǵni otbasynyń qai sanatqa jatatyny bir ǵana kórsetkishpen anyqtalmaidy. Barlyq faktor birge eskeriledi.
«Sondyqtan páterdiń, kóliktiń nemese basqa da múliktiń bolýy ózdiginen otbasyn belgili bir sanatqa jatqyzýǵa negiz bolmaidy» dep anyq jazylǵan resmi habarlamada.
Mańyzdysy mynaý:
Jańa tásilmen baǵalanǵan kezde A nemese V sanatyndaǵy otbasylarǵa muqtajdyq deńgeiine qarai taǵaiyndalatyn jekelegen járdemaqylar berilmeidi. Al qazir osy tólemderdi alyp júrgen otbasylarǵa járdemaqy zańnamada belgilengen tártippen toqtaidy.
S, D jáne E sanatyndaǵy otbasylarǵa tiisti memlekettik qoldaý sharalary burynǵy talaptarǵa sai kórsetile beredi.
Eńbek ministrligi habarlaidy: Bul ózgerister áleýmettik qoldaýdyń búkil júiesi joiylady degendi bildirmeidi. Zańnamada azamattardyń jekelegen sanattaryna arnalǵan erekshelikter men kepildikter bar. Olar otbasynyń ál-aýqat deńgeiine qaramastan saqtalady.
Eger otbasynyń ómirlik jaǵdaiy ózgerse, memlekettik aqparattyq júielerdegi jańartylǵan málimetter negizinde onyń áleýmettik-ekonomikalyq jaǵdaiy qaita qaralýy múmkin. Bul jańa talap 2027 jylǵy 1 qańtardan bastap kúshine enýi múmkin.
