Aqmola oblysynyń Atbasar qalasyndaǵy túzeý mekemesinde jazasyn ótep júrgen Erjuman Arynbek esimdi azamat kóz jumdy. Týystarynyń aitýynsha, onyń bostandyqqa shyǵýyna shamamen 20 kún qalǵan.
Marqumnyń jaza merzimi qazan aiynyń sońynda aiaqtalýy tiis bolǵan. Alaida 9 qazanda otbasyna onyń qaitys bolǵany týraly habar jetken.
Týystarynyń sózinshe, olarǵa Erjuman Arynbektiń óz-ózine qol jumsaǵany aitylǵan. Alaida jaqyndary bul nusqaǵa kúmán keltirip otyr.
Olar áleýmettik jelide beineúndeý jariialap, oqiǵanyń barlyq mán-jaiyn ashyq ári ádil tekserýdi talap etti.
Marqumnyń týystary onyń az ýaqyttan keiin bostandyqqa shyǵýy tiis bolǵanyn alǵa tartyp, mundai qadamǵa barýy múmkin ekenine senbeitinderin jetkizgen.
Sonymen qatar otbasy túzeý mekemesindegi jaǵdai men qyzmetkerlerdiń áreketterine quqyqtyq baǵa berilýin surap otyr.
Oqiǵaǵa qatysty Qylmystyq-atqarý júiesi komitetine resmi saýal joldanǵan. Ázirge vedomstvonyń resmi túsiniktemesi jariialanǵan joq.
