2027 jylǵy 1 qańtardan bastap Qazaqstanda muqtajdyq deńgeiine qarai áleýmettik qoldaý kórsetý tártibi engiziledi. Osy ózgeristerden keiin C, D jáne E sanattaryna jatatyn otbasylar tiisti talaptardy saqtaǵan jaǵdaida birqatar memlekettik járdemaqy men áleýmettik qoldaý sharalaryn alý quqyǵyn saqtaidy, dep habarlaidy dalanews.kz.
C, D jáne E sanattary kimderge beriledi?
C sanaty – ortasha tabysy bar, turmys jaǵdaiy turaqty otbasylar.
D sanaty – ekonomikalyq turǵydan osal otbasylar. Olardyń jaǵdaiyn baǵalaý kezinde tabysynyń tómendigi, eńbekke qabiletti otbasy músheleriniń turaqty jumysynyń bolmaýy, turǵyn úi máselesi, merzimi ótken kreditteri jáne basqa da faktorlar eskeriledi.
E sanaty – ekonomikalyq jáne áleýmettik turǵydan osal, memleket tarapynan birinshi kezekte kómek kórsetýdi qajet etetin otbasylar. Ádette mundai otbasylarda birneshe másele qatar kezdesedi. Máselen, tabysy óte tómen bolýy, turaqty jumysynyń, baspanasynyń, múlki men jinaq aqshasynyń bolmaýy, sondai-aq merzimi ótken qarjylyq mindettemeleriniń bolýy múmkin.
Otbasynyń sanaty qalai anyqtalady?
Otbasynyń sanatyn anyqtaý kezinde tek jalaqy mólsheri esepke alynbaidy. Otbasynyń tsifrlyq kartasy arqyly 50-den astam kórsetkish taldanady.
Olardyń qatarynda otbasynyń tabysy, jumyspen qamtylý jaǵdaiy, turǵyn úii men basqa da jyljymaityn múlki, avtokólikteri, kreditteri, biznesi, jer ýchaskeleri, otbasy quramy jáne ózge de málimetter bar.
Qandai otbasylardyń járdemaqysy toqtatylýy múmkin?
2027 jyldan bastap joǵary jáne aýqatty turmys deńgeiin bildiretin A jáne B sanattaryndaǵy otbasylar muqtajdyq ólshemi engiziletin keibir áleýmettik tólemderden aiyrylýy múmkin.
Al C, D jáne E sanattaryndaǵy otbasylar tiisti tólemderdi alý úshin qoiylatyn ózge de talaptardy oryndaǵan jaǵdaida memlekettik qoldaý alý quqyǵyn saqtaidy.
Bul rette otbasynyń sanaty turaqty bolyp qalmaidy. Eger onyń qarjylyq jaǵdaiy ózgerse, mártebesi qaita qaralýy múmkin.
Memlekettik aqparattyq júielerdegi derekter avtomatty túrde jańartylyp otyrady. Al úi sharýashylyǵynyń sanaty ai saiyn anyqtalady.
