Pavlodarda prokýratýra qyzmetkeri basqarǵan kólik qaǵyp ketken 60 jastaǵy áiel qaitys boldy. Osyǵan bailanysty qylmystyq istiń saralanýy ózgertilip, tergeý jalǵasyp jatyr, dep habarlaidy dalanews.kz.
Pavlodar oblystyq politsiia departamentiniń málimetinshe, jábirlenýshiniń 2026 jylǵy 23 tamyzda qaitys bolýyna bailanysty qylmystyq is Qazaqstan Respýblikasy Qylmystyq kodeksiniń 345-babynyń 3-bóligi boiynsha qaita saralanǵan. Bul bap abaisyzda adam ólimine ákep soqqan jol qozǵalysy erejelerin buzýǵa qatysty.
Júrgizýshige shaqyrý boiynsha kelý mindettemesi túrindegi protsestik májbúrleý sharasy qoldanylǵan. Tergeý aiasynda syrtqy beinebaqylaý kameralarynyń jazbalary alynyp, oqiǵanyń mán-jaiyn jan-jaqty anyqtaýǵa baǵyttalǵan tergeý áreketteri júrgizilip jatyr.
Politsiianyń habarlaýynsha, tergeý nátijesi boiynsha túpkilikti protsestik sheshim qabyldanady.
Buǵan deiin, 2026 jylǵy 13 tamyzda Pavlodarda Nurmaǵambetov pen Kamzin kósheleriniń qiylysynda jol-kólik oqiǵasy bolǵany habarlanǵan edi. Kólik qaǵyp ketken 60 jastaǵy áiel Sultanov atyndaǵy oblystyq klinikalyq aýrýhanaǵa jetkizilgen.
Alǵashynda qylmystyq is Qylmystyq kodekstiń 345-babynyń 2-bóligi boiynsha qozǵalǵan. Keiin Pavlodar oblysynyń prokýratýrasy kólik tizgininde qadaǵalaý organynyń qyzmetkeri bolǵanyn rastaǵan.
