Astanada uialy telefonmen sóilesip kele jatyp, jaiaý júrginshini qaǵyp óltirgen avtobýs júrgizýshisi eki jyl bir aiǵa bas bostandyǵynan aiyryldy, dep habarlaidy dalanews.kz.
Tergeý materialdaryna sáikes, júrgizýshi avtobýs tizgininde otyryp, telefonmen sóilesken kezde rettelmeitin jaiaý júrginshiler ótkelinen ótip bara jatqan 57 jastaǵy áieldi qaǵyp ketken.
Jábirlenýshi aýyr jaraqattar alyp, aýrýhanada kóz jumdy.
Sotta memlekettik aiyptaýshy júrgizýshiniń kinásin tolyq dáleldedi. Sot úkimimen oǵan eki jyl bir ai merzimge bas bostandyǵynan aiyrý jazasy taǵaiyndalyp, bes jyl merzimge kólik quralyn basqarýǵa tyiym salyndy.
Sot úkimi zańdy kúshine endi.
Astana qalasynyń prokýratýrasy júrgizýshilerdi jol qozǵalysy erejelerin saqtaýǵa jáne kólik júrgizý kezinde uialy telefon paidalanbaýǵa shaqyrdy.
