Qazaqstanda perzenthanalar, balalar statsionarlary men jedel járdem stantsiialarynyń 357 basshysy jáne olardyń orynbasary kásibi biliktiligin baǵalaý úshin attestattaýdan ótedi. Testileý 14 qazanda bastaldy, dep habarlaidy dalanews.kz.
Densaýlyq saqtaý ministri Aqmaral Álnazarova meditsinalyq uiymdardyń basshylary men olardyń orynbasarlaryn kezekten tys attestattaýdan ótkizý týraly tapsyrma bergen. Onyń aitýynsha, meditsinalyq kómektiń sapasy dárigerlerdiń kásibiligine ǵana emes, aýrýhana jumysyn uiymdastyrýǵa jáne basqarýshylyq sheshimderdiń qanshalyqty jyldam qabyldanatynyna da bailanysty.
Ministrlik málimetinshe, bul kezeńde 357 basshy men olardyń orynbasary baǵalaýdan ótedi. Al perzenthanalar, balalar meditsinasy jáne jedel járdem qyzmetteri júiesinde ártúrli deńgeidegi shamamen 1,1 myń basshy men orynbasar jumys isteidi.
Attestattaý kezinde basshylardyń normativtik talaptardy bilýi ǵana emes, olardy is júzinde oryndaýdy qamtamasyz etý qabileti de baǵalanady. Atap aitqanda, ujym jumysyn uiymdastyrý, naýqastarǵa meditsinalyq kómekti ýaqytyly kórsetý, resýrstardy tiimdi paidalaný jáne meditsina qyzmetkerleriniń kásibi damýyna jaǵdai jasaý máselelerine nazar aýdarylady.
Aqmaral Álnazarova bas dárigerdiń jaýapkershiligi qujattarmen jumys isteýmen shektelmeitinin atap ótti. Onyń aitýynsha, meditsinalyq uiym basshysy aýrýhananyń jumysyna jáne patsienttiń qandai nátije alyp shyǵatynyna jaýapty.
Ministrlik attestattaýdyń negizgi maqsaty meditsinalyq kómektiń qaýipsizdigin, qoljetimdiligin jáne ýaqytyly kórsetilýin qamtamasyz etý ekenin málimdedi.
