Almatyda qoǵam belsendisi Sanjar Boqaevqa, onyń jieni Madiiar Kalmenovke jáne videograf Ulan Núsipqodaǵa qatysty qylmystyq isti qaraý bastaldy. Alǵashqy sot otyrysynda qorǵaýshylar is materialdarymen tanysý kezinde zańbuzýshylyqtarǵa jol berilgenin málimdep, isti prokýrorǵa qaitarýdy surady. Sondai-aq advokattardyń biri sýdiaǵa qarsylyq bildiretinin aitty, dep habarlaidy dalanews.kz.
Sanjar Boqaevqa qandai aiyptar taǵylǵan?
16 qazanda Almaty qalasynyń Almaly aýdandyq qylmystyq ister jónindegi sotynda Sanjar Boqaevqa qatysty istiń alǵashqy otyrysy ótti. Sotta onyń jieni Madiiar Kalmenov pen videograf Ulan Núsipqoja da aiyptalýshy retinde otyr.
Is Qazaqstan Respýblikasy Qylmystyq kodeksiniń bes baby boiynsha qaralyp jatyr:
190-bap – alaiaqtyq;
188-bap – urlyq;
218-bap – qylmystyq jolmen alynǵan aqshany nemese ózge múlikti zańdastyrý;
340-bap – aǵashtar men butalardy zańsyz kesý;
274-bap – kórineý jalǵan aqparat taratý.
Qorǵaýshylar isti nege prokýrorǵa qaitarýdy surady?
Sot otyrysynda advokattar qylmystyq is materialdarymen tolyq tanysýǵa múmkindik berilmegenin málimdedi.
Advokat Alma Mýsinanyń aitýynsha, diskilerdegi keibir beinejazbalar ashylmaǵan. Sonymen qatar qorǵaý tarapy ózine berilgen materialdardy tolyq zerttep úlgermegen.
Advokat Artem Askarovtyń sózinshe, qorǵaýshylar is boiynsha 12 tom materialmen tanyspaǵan. Al Sanjar Boqaev hat almasýlardy qamtityn qujattardyń tek úsh tomyn ǵana zerttegen.
Budan bólek, advokattar qazaq tilindegi beinejazbalardy qaraý úshin aýdarmashy berilmegenin aitty.
Osy ýájderge bailanysty qorǵaý tarapy isti boljamdy zańbuzýshylyqtardy joiý úshin prokýrorǵa qaitarýdy surady. Sýdia úzilis jariialady.
