25 qazanda Qazaqstanda Respýblika kúni atap ótiledi. Ulttyq merekege orai Astanada saltanatty, mádeni-tanymdyq, bilim berý, sporttyq, ekologiialyq jáne áleýmettik baǵyttaǵy 120-dan astam is-shara josparlanyp otyr. Elorda turǵyndary men qonaqtaryna arnap kontsertter, kórmeler, spektaklder, sporttyq týrnirler, merekelik aktsiialar, jańa nysandardyń ashylýy jáne basqa da sharalar uiymdastyrylady, dep habarlaidy dalanews.kz Astana ákimdiginiń resmi saityna silteme jasap.
Respýblika kúnine orai elordada birqatar jańa nysan ashylady. Atap aitqanda, M. Tólebaev kóshesi, 3 mekenjaiynda «TANYM SPORT» kópfýnktsionaldy kesheni, al Sultan Beibarys kóshesi, 15 mekenjaiynda «TANYM ART» kesheni jumysyn bastaidy.
Sonymen qatar №2 kópbeiindi qalalyq balalar aýrýhanasynyń qosymsha ǵimaraty jáne №2 qalalyq kópbeiindi aýrýhananyń qabyldaý-diagnostikalyq keshenin ashý josparlanyp otyr.
Ulttyq merekege orai Astanada mádeni-bilim berý baǵdarlamasy da ázirlendi. Onyń aiasynda ádebiet pen óner ókilderimen kezdesýler, ǵylymi-praktikalyq konferentsiialar, kórmeler, belgili bir taqyryptaǵy keshter, pikirsaiystar jáne basqa da is-sharalar ótedi.
20 qazanda saǵat 17:00-de «Jastar» saraiynda «Elim dep soqqan júregim» atty patriottyq kesh ótedi. Sol kúni elordanyń barlyq mektebinde Respýblika kúnine arnalǵan biryńǵai synyp saǵaty uiymdastyrylady.
20-24 qazan aralyǵynda elordalyq mektepterde oqýshylar arasynda «Eger men Prezident bolsam…» taqyrybynda pikirsaiystar jáne «Meniń elim – Qazaqstan» atty sýret baiqaýy ótkiziledi.
21 qazanda saǵat 11:00-de Sáken Seifýllin mýzeiinde «Ult rýhyn ulyqtaǵan Sáken» atty mádeni-tanymdyq kesh ótedi. Sol kúni Aqjan ál-Mashani atyndaǵy №92 mektep-litseiinde Ótegen Seiitov atyndaǵy «Bolashaq prokýror» klýbynyń qatysýshylary arasynda «QAZAQSTAN QUIZ» ziiatkerlik oiyny uiymdastyrylady.
22 qazan kúni saǵat 11:00-de Dostyq úiinde Ǵylymi-saraptamalyq toptyń qatysýymen konferentsiia ótedi.
Sol kúni saǵat 11:00-de Ortalyq balalar men jasóspirimder kitaphanasynda jazýshy, dramatýrg Joltai Jumat-Álmashulymen «Zerdeli ult – kitap oqityn otbasynan bastalady» taqyrybynda kezdesý uiymdastyrylady. Keiin kitaphanada «Ádebiet álemindegi túngi kerýen» atty ádebi is-shara ótedi. Ol kitaphanada tún ótkizý formatynda uiymdastyrylady.
Saǵat 19:00-de «Jastar» saraiynda «Astana» estradalyq-simfoniialyq orkestri «Uly dala áýeni» atty merekelik kontserttik baǵdarlamasyn usynady.
23 qazanda saǵat 10:00-de Astana qalasynyń memlekettik arhivinde oqýshylarmen «Egemen eldiń erteńi» atty kezdesý ótedi.
Saǵat 11:00-de M. Áýezov atyndaǵy Ortalyq qalalyq kitaphanada memleket jáne qoǵam qairatkeri Saýytbek Ábdirahmanov pen tarihshy, tarih ǵylymdarynyń kandidaty, professor Kúlpash Iliiasovanyń elordanyń belsendi jastarymen kezdesýi ótedi. Kezdesý «Baitaq elim – Qazaqstan!» taqyrybyna arnalady.
Merekelik is-sharalar elordanyń alty aýdanyndaǵy Belsendi uzaq ómir súrý ortalyqtarynda da uiymdastyrylady.
23 qazanda saǵat 11:00-de R. Qoshqarbaev dańǵyly, 29/1 mekenjaiynda «Án-jyrym saǵan, Qazaqstan» atty merekelik kontserttik baǵdarlama ótedi. Sol kúni keshke mádeni baǵdarlama Memlekettik «NAZ» bi teatrynyń kontsertimen jalǵasady. Ujym saǵat 19:00-de «Ańsaǵan arman» atty kontsert usynady.
Sondai-aq elordanyń barlyq alty aýdanynda merekelik kontsertter ótedi.
Atap aitqanda, 24 qazanda Prigorodnyi, Otaý, Ónerkásip, Baǵystan, Óndiris jáne Temirjolshylar turǵyn alaptarynda, «Qorǵaljyn», «Jaǵalaý», «Atatúrik», «Aiǵyrjal» jáne «Jastar» gúlzarlarynda, sondai-aq qalalyq alańda kontserttik baǵdarlamalar uiymdastyrylady.
Respýblika kúni – 25 qazan kúni de mazmundy baǵdarlama josparlanyp otyr. Saǵat 11:00-de Óner mýzeii kelýshilerdi «Rýhty el» atty lektsiia-kontsertke shaqyrady. Al M. Gorkii atyndaǵy Memlekettik akademiialyq orys drama teatry «Er-Tóstik týraly ańyz» ertegisin usynady.
Mýzykalyq jas kórermen teatry saǵat 16:00-de «Qazaqstan óneriniń maqtanyshtary» atty shyǵarmashylyq kesh ótkizedi. Saǵat 18:00-de «Abai – Toǵjan» mýzykalyq dramasyn sahnalaidy.
Osy ýaqytta Á. Mámbetov atyndaǵy Memlekettik drama jáne komediia teatry «Jas Abai» spektaklin kórsetedi.
Budan bólek, 25 qazanda áleýmettik osal sanattaǵy balalarǵa Qazaqstannyń Ulttyq mýzeii men «Báiterek» monýmentine ekskýrsiialar uiymdastyrylady.
Mereke kúnderi elorda turǵyndary men qonaqtary aýyl sharýashylyǵy jármeńkesine de bara alady. Jármeńke 24-25 qazanda Qarqaraly tasjoly, 1 mekenjaiyndaǵy «Qazanat» ippodromynyń avtoturaǵynda ótedi.
Jármeńkede Qaraǵandy jáne Qostanai oblystarynyń sharýalary óz ónimderin usynady. Saýda oryndary saǵat 09:00-den 18:00-ge deiin jumys isteidi. Kelýshiler jańa azyq-túlik ónimderin óndirýshilerdiń ózinen tiimdi baǵamen satyp ala alady.
Respýblika kúnin merekeleý baǵdarlamasynda kásibi sportshylardy, jastardy jáne túrli jastaǵy qala turǵyndaryn biriktiretin sporttyq jarystarǵa da erekshe kóńil bólinedi.
15-17 qazan aralyǵynda «Barys Arenada» júzýden álem kýbogynyń kezeńi ótedi. Jarysty tamashalaý úshin bilet satyp alý qajet.
17-18 qazanda saǵat 09:00-den bastap Sana Sport sport kesheninde «Zań men tártip» qaǵidaty aiasynda Astana ákimdigine qarasty uiymdardyń qyzmetkerleri arasynda voleibol týrniri ótedi.
19 qazanda Aqshoqy-2 mekenjaiyndaǵy Paralimpiadalyq jattyǵý ortalyǵynda kórý qabileti buzylǵan qatysýshylar arasynda toǵyzqumalaqtan Astana chempionaty uiymdastyrylady. Erteńinde, 20 qazanda, saǵat 10:00-de osy ortalyqta estý jáne kórý qabileti buzylǵan qatysýshylar arasynda shahmattan ashyq qalalyq chempionat ótedi.
22 qazanda saǵat 10:00-de Belsendi uzaq ómir súrý ortalyǵynda Esil aýdanynyń zeinetkerleri arasynda shahmat týrniri uiymdastyrylady.
Sol kúni saǵat 14:00-de «MÝA» pedagogikalyq kolledjinde Almaty aýdany kolledjderiniń stýdentteri arasynda ulttyq sport túrlerinen jarystar ótedi.
23 qazan kúni saǵat 10:00-de Qalamgerler alleiasynda Baiqońyr aýdanynyń turǵyndary arasynda ulttyq sport túrlerinen saiystar uiymdastyrylady. Qatysýshylar toǵyzqumalaq, asyq atý, armrestling jáne láńgi tebý sport túrlerinen baq synaidy.
24 qazanda «Barys Arenada» kúres túrlerinen álem chempionaty ótedi. Jarysqa arnaiy biletpen kirýge bolady.
