Karateden álem chempiony Móldir Jańbyrbai Qyzylordada bes ailyq sábidiń ólimine ákelgen jol apatyna qatysty málimdeme jasady. Sportshy zardap shekken áieldiń óziniń kelini ekenin aityp, kúdiktiniń áli ustalmaǵanyna alańdaýshylyq bildirdi, dep habarlaidy dalanews.kz.
Sportshynyń sózinshe, qaiǵyly oqiǵa 13 qazan kúni saǵat 17:30 shamasynda bolǵan. Sol ýaqytta onyń inisiniń jubaiy Nargiz bes ailyq ulymen kóshede serýendep júrgen.
Saǵynbaev kóshesinen Qultekenov kóshesine burylǵan avtokóliktiń júrgizýshisi rólge ie bola almai, anasy men balasyn qaǵyp ketken.
"Soqqynyń qatty bolǵany sonshalyq, anasy men sábi birneshe metrge ushyp ketken. Áiel bir jaqqa, al bala joldyń ortasyna qulaǵan. Kólik júrgizýshisi oqiǵadan keiin kóligin, telefonyn, tipti aiaq kiimin de sol jerde qaldyryp, qashyp ketken. Jedel járdem men politsiia kelgenge deiin kúdikti qaladan ketip qalǵan degen aqparat bar. Ókinishke qarai, bes ailyq sábi aýrýhanaǵa jetkende kóz jumǵan. Al anasynyń jaǵdaiy óte aýyr. Nargiz úshinshi kún qatarynan jansaqtaý bóliminde jatyr", – dedi sportshy.
Móldir Jańbyrbai kelininiń aýyr jaraqat alǵanyn jetkizdi. Onyń aitýynsha, Nargizdiń jambas súiegi eki jerden synyp, denesiniń sol jaq bóligi qatty zaqymdanǵan. Sondai-aq bas súiegi synyp, basynda gematoma paida bolǵan.
Qazir áiel jansaqtaý bóliminde em qabyldap jatyr. Sportshynyń sózinshe, onyń esi birde kirip, birde shyǵady.
"Júrgizýshi nege áli ustalmady?"
Móldir Jańbyrbaidy alańdatqan basty másele – jol apatyna qatysy bar júrgizýshiniń izdeýde júrýi.
Sportshy politsiia qyzmetkerleriniń kúdiktini ustaýǵa qatysty áreketine kóńili tolmaitynyn jetkizdi. Sondai-aq onyń aitýynsha, atalǵan júrgizýshi buǵan deiin de jol apattaryna qatysqan.
"Bizdiń basty máselemiz – buǵan deiin eki adamdy qaǵyp ketken kezde bul adam ustalǵanda, mundai jaǵdai bolmas pa edi? Qazir bes ailyq sábiimizden aiyrylyp otyrmyz. Al anasy jansaqtaý bóliminde jatyr. Júrgizýshi áli kúnge deiin ustalmai otyr", – dep dabyl qaqty.
Sportshy qaiǵyly jaǵdaiǵa kináli adamnyń zań aldynda jaýap berýin talap etip otyr.
Aita keteiik, buǵan deiin Qyzylorda oblysynyń politsiiasy adam ólimine ákelgen jol-kólik oqiǵasy boiynsha qylmystyq ister qozǵalǵanyn jáne kúdiktiniń jeke basy anyqtalǵanyn habarlaǵan.
