Búgin Astanada Qazaq ulttyq sport ýniversitetiniń (KNUS) bes jyldyq mereitoiy atap ótildi. Mereitoidyń basty oqiǵasy ýniversitetti memleket menshigine óteýsiz berý týraly qujatqa qol qoiý boldy. Metsenat Nurasyl Medeýdiń bastamasymen qurylǵan joba bes jyl ishinde 150 stýdentten bes myń bilim alýshysy bar, Qazaqstandaǵy sporttyq bilim berýdiń mańyzdy ortalyqtarynyń birine ainaldy, dep habarlaidy dalanews.kz.
Ýniversitettiń bes jyldyǵyna orai saltanatty rásim uiymdastyryldy. Is-shara barysynda oqytýshylar men qyzmetkerlerge qurmet gramotalary men alǵys hattar tabystalyp, stýdentterge bilim alý granttary berildi.
Mereitoidyń basty oqiǵasy KNUS-ti memleketke óteýsiz berý týraly qujatqa qol qoiý rásimi boldy. Oǵan ýniversitettiń negizin qalaýshy Nurasyl Medeý men Qazaqstan Respýblikasy Ǵylym jáne joǵary bilim ministrliginiń ókilderi qatysty.
Is-sharada sóz sóilegen Nurasyl Medeý ýniversitetti memleketke berý týraly sheshimniń erikti túrde jáne sanaly túrde qabyldanǵanyn atap ótti.
«Bul – satý da, senimgerlik basqarýǵa berý de, májbúrli túrde jasalǵan qadam da emes. Bul – týǵan elime jasalǵan óteýsiz syi», – dedi KNUS negizin qalaýshy.
Bes jylda ideiadan tolyqqandy ýniversitetke deiin
KNUS tarihy 2021 jyly kásibi sportty, akademiialyq bilimdi, ǵylym men innovatsiialyq tehnologiialardy biriktiretin zamanaýi sporttyq bilim berý júiesin qurý ideiasynan bastaldy.
Jobanyń bastamashysy Nurasyl Medeý boldy. Ol Boston ýniversitetinde bilim alý barysynda sport pen joǵary bilimdi integratsiialaýdyń halyqaralyq tájiribesimen tanysqan.
Bul ideiany júzege asyrý úshin qomaqty jeke investitsiia, ýaqyt pen úlken uiymdastyrýshylyq jumys qajet boldy. Bes jyl ishinde joba bastapqy tujyrymdama men sáýlettik sheshimderden bastap, ózindik bilim berý modeli men sporttyq infraqurylymy bar tolyqqandy ýniversitetke ainaldy.
Alǵashynda oqý ornynda nebári 150 stýdent bilim alsa, búginde olardyń sany bes myńǵa jetti.
«Bes jyl ishinde biz birge óz ataýy, jetistikteri, myqty komandasy men talantty stýdentteri bar ýniversitet qurdyq», – dep atap ótti Nurasyl Medeý.
Búginde KNUS tek sportshylar men jattyqtyrýshylardy ǵana emes, sonymen qatar sporttyq menedjment, analitika, ǵylym jáne basqarý salalarynyń mamandaryn da daiarlaidy.
Ulttyq quramalardy tegin daiarlaý jáne sporttyq jetistikter
KNUS qyzmetiniń negizgi baǵyttarynyń biri – Qazaqstannyń ulttyq quramalaryna qoldaý kórsetý.
Ýniversitet kúres, taekvondo, semserlesý, jeńil atletika jáne basqa da sport túrlerimen ainalysatyn sportshylarǵa jattyǵý infraqurylymyn tegin usynady.
Mundai qoldaý otandyq sportty damytýǵa jáne sportshylardyń halyqaralyq jarystarǵa daiyndalýyna qolaily jaǵdai jasaýǵa qosylǵan úles retinde qarastyrylady.
Bul jumystyń nátijeleri de baiqala bastady. Ýniversitettiń málimetinshe, KNUS sportshylary Aziia oiyndarynda 14 medal jeńip alǵan.
Sonymen qatar KNUS-tiń bilim berý modeli sportshylardy keshendi daiarlaýdy kózdeidi. Oǵan ǵylymi súiemeldeý, sporttyq meditsina, analitika jáne zamanaýi tehnologiialardy qoldaný kiredi.
Daryndy jastarǵa arnalǵan granttar qarastyrylǵan
Ýniversitet jumysynyń mańyzdy baǵyttarynyń biri – qabiletti jastardy, ásirese Qazaqstannyń aýyldyq jerleri men óńirlerinen kelgen stýdentterdi qoldaý.
KNUS-te Life Chance Grant jáne Life Merit Grant atty granttyq baǵdarlamalar jumys isteidi.
Birinshi baǵdarlama oqý aqysyn, turý shyǵyndaryn, akademiialyq utqyrlyqty qarjylandyrýdy, sondai-aq stipendiialyq jáne tálimgerlik qoldaýdy qamtýy múmkin. Ekinshi baǵdarlama oqý úlgerimi men basqa da baǵyttarda joǵary nátijeler kórsetetin stýdentterge arnalǵan.
Mereitoilyq is-sharada ýniversitet memleketke berilgennen keiin de onyń áleýmettik mindettemeleriniń saqtalýyna erekshe nazar aýdaryldy.
Nurasyl Medeýdiń aitýynsha, buryn taǵaiyndalǵan granttar boiynsha stýdentterdiń búkil oqý kezeńindegi shyǵyndaryn qarjylandyrýǵa qajetti qarajat aldyn ala rezervke qoiylǵan. Tiisti mindettemelerdi zań júzinde bekitý josparlanyp otyr.
Osylaisha, bilim alýǵa qoldaý alǵan stýdentter oqýyn buryn belgilengen sharttar boiynsha jalǵastyra alady.
Jasandy intellekt jáne jańa mamandyqtar
Kásibi sportshylardy daiarlaýmen qatar KNUS sport indýstriiasynda suranysqa ie zamanaýi bilim berý baǵyttaryn da damytyp keledi.
Ásirese jasandy intellekt pen tsifrlyq analitikaǵa erekshe kóńil bólinedi. Bul tehnologiialar sportshylardyń qozǵalysyn taldaýǵa, jattyǵý úderisin jetildirýge jáne qarsylastardyń taktikasyn zertteýge múmkindik beredi.
Ýniversitet sporttyq menedjment pen basqarý baǵdarlamalaryn da damytyp jatyr. Atap aitqanda, sport salasyndaǵy Executive MBA baǵdarlamasy aiasynda shamamen 500 tyńdaýshy bilim alýda.
Aldaǵy ýaqytta KNUS sport jýrnalisteri men media mamandaryn daiarlaý baǵyttaryn keńeitýdi, sondai-aq arnaiy media zerthana qurýdy josparlap otyr.
Zamanaýi bilim berý tájiribesin engizýge jáne akademiialyq utqyrlyqty damytýǵa múmkindik beretin halyqaralyq yntymaqtastyq ta mańyzdy ról atqarady.
Metsenattyqtyń jańa deńgeii
KNUS-tiń memleketke óteýsiz berilýi bilim berý salasyndaǵy uzaq merzimdi metsenattyqtyń úlgisine ainaldy.
Jekelegen bastamalardy qarjylai qoldaýmen shekteletin dástúrli qaiyrymdylyqtan aiyrmashylyǵy, bul jaǵdaida tolyqqandy bilim berý mekemesi qurylyp, keiin memleketke berilip otyr.
Bes jyl boiy Nurasyl Medeý jobany júzege asyrýǵa óz qarajatyn, kúsh-jigeri men ýaqytyn jumsady. Bastapqy ideia men sáýlettik tujyrymdamadan bastalǵan ýniversitet búginde myńdaǵan stýdenti, sporttyq jetistikteri jáne halyqaralyq bailanystary bar jumys istep turǵan bilim berý ortalyǵyna ainaldy.
Sonymen qatar Astanadaǵy KNUS kampýsy bastapqydan-aq memlekettik menshikte bolǵanyn atap ótken jón. Ýniversitet onyń jumysyn senimgerlik basqarý aiasynda qamtamasyz etti. Al jeke investitsiialar ǵimarat pen infraqurylymdy jabdyqtaýǵa, bilim berý ortasyn damytýǵa jáne túrli baǵdarlamalardy júzege asyrýǵa baǵyttaldy.
Mereitoilyq is-sharada Nurasyl Medeý:
«Biz qurǵan dúnieniń bári jastarymyzǵa, sportymyzǵa jáne elimizge qyzmet etýi kerek», – dep atap ótti.
Ýniversitettiń memleketke berilýi onyń damýynyń jańa kezeńine jol ashady. Jeke bastamanyń arqasynda qurylǵan bilim berý jobasy kásibi sportshylar men bilikti mamandar daiarlaýdy, sondai-aq daryndy jastardy qoldaýdy jalǵastyrady.
KNUS tarihy bilimge salynǵan investitsiia adam kapitalynyń damýyna jáne Qazaqstan sportynyń bolashaǵyna uzaq merzimdi úles qosatyn qaiyrymdylyq modelin kórsetedi.
