Májilis depýtaty Aıdos Sarym jalǵan koýchtar men rýhanı alaıaqtar qoǵam úshin qaýipti qubylysqa aınalǵanyn málimdedi, dep habarlaıdy Dalanews.kz.
Ol mádenıet jáne aqparat mınıstri Aıda Balaevaǵa depýtattyq saýal joldady.
"Keıingi ýaqytta elimizde keńinen taralyp ketken san alýan ezoterıkalyq, psevdospıhologıalyq jalǵan ilimder men sektalardyń ásire belsendiligi qatty alańdatyp otyr. Ózderine jalǵan dıplom jasatyp, ataǵy jer jaratyn "akademıalardyń", álemdik "uıymdardyń" atynan sóz sóılep júrgen baqsy-qushnashtyń, trener-koýchterdiń sharalarynyń sany kún sanap artyp keledi", - dedi ol.
Depýtattyń sózinshe, mundaılardyń jarnamasy da jer jarady.
"Qaı bir saıtty, áleýmettik jelini ashyp qalsań boldy, álemniń barsha qupıasyn meńgergen, adamnyń jan dúnıesiniń búkil kiltin beline baılaǵan mamansymaqtar kópshilikpen kezdesýler, kýrstar, semınarlar ótkizip jatady. Ókinishtisi, muny jekelegen adamdardyń óz tańdaýy, jeke quqyǵy dep te aıta almaımyz. Rýhanı alaıaqtar memleketettik mekemelerge, kvazımemlekettik sektordaǵy uıymdarǵa deıin jetip, memlekettik, qoǵamdyq problemaǵa aınalǵanyn baıqap otyrmyz", - dedi Sarym.
Aıdos Sarym sońǵy kezderi elimizde "Súsaı" dep atalatyn kýrstar qaýlap tarap jatqanyn jetkizdi.
"Bul baǵyt ózin "adamnyń ishki áleýetin ashatyn sandyq psıhologıa" dep tanystyrǵanymen, is júzinde ǵylymı negizi joq, ezoterıkalyq jáne dinı sıpattaǵy komersıalyq jobaǵa aınalyp otyr. Búginde "Sıýsaı" ataýyn jamylǵan toptar jabyq formattaǵy sharalar ótkizip,óz ýaǵyzdaryn keńinen taratyp júr. Olardyń basym bóligi – lısenzıasyz, sertıfıkatsyz, tirkelmegen tulǵalar.
Jalǵan ilimniń basty maqsaty – azamattardy "rýhanı damý" uranymen ılandyryp, sandar men sımvoldarǵa súıengen psevdoteorıa arqyly materıaldyq paıda tabý. Kóptegen adam, ásirese, áıelder men jastar, qarjylaı shyǵynǵa ushyrap, psıhologıalyq táýeldilikke túsip jatyr, al keıbiri otbasylyq jáne áleýmettik kúızeliske tap bolyp otyr", - dedi ol.
