ءماجىلىس دەپۋتاتى ايدوس سارىم جالعان كوۋچتار مەن رۋحاني الاياقتار قوعام ءۇشىن ءقاۋىپتى قۇبىلىسقا اينالعانىن مالىمدەدى، دەپ حابارلايدى Dalanews.kz.
ول مادەنيەت جانە اقپارات ءمينيسترى ايدا بالايەۆاعا دەپۋتاتتىق ساۋال جولدادى.
"كەيىنگى ۋاقىتتا ەلىمىزدە كەڭىنەن تارالىپ كەتكەن سان الۋان ەزوتەريكالىق، پسيەۆدوسپيحولوگيالىق جالعان ىلىمدەر مەن سەكتالاردىڭ اسىرە بەلسەندىلىگى قاتتى الاڭداتىپ وتىر. وزدەرىنە جالعان ديپلوم جاساتىپ، اتاعى جەر جاراتىن "اكادەميالاردىڭ"، الەمدىك "ۇيىمداردىڭ" اتىنان ءسوز سويلەپ جۇرگەن باقسى-قۇشناشتىڭ، ترەنەر-كوۋچتەردىڭ شارالارىنىڭ سانى كۇن ساناپ ارتىپ كەلەدى"، - دەدى ول.
دەپۋتاتتىڭ سوزىنشە، مۇندايلاردىڭ جارناماسى دا جەر جارادى.
"قاي ءبىر سايتتى، الەۋمەتتىك جەلىنى اشىپ قالساڭ بولدى، الەمنىڭ بارشا قۇپياسىن مەڭگەرگەن، ادامنىڭ جان دۇنيەسىنىڭ بۇكىل كىلتىن بەلىنە بايلاعان مامانسىماقتار كوپشىلىكپەن كەزدەسۋلەر، كۋرستار، سەمينارلار وتكىزىپ جاتادى. وكىنىشتىسى، مۇنى جەكەلەگەن ادامداردىڭ ءوز تاڭداۋى، جەكە قۇقىعى دەپ تە ايتا المايمىز. رۋحاني الاياقتار مەملەكەتەتتىك مەكەمەلەرگە، كۆازيمەملەكەتتىك سەكتورداعى ۇيىمدارعا دەيىن جەتىپ، مەملەكەتتىك، قوعامدىق پروبلەماعا اينالعانىن بايقاپ وتىرمىز"، - دەدى سارىم.
ايدوس سارىم سوڭعى كەزدەرى ەلىمىزدە "سيۋساي" دەپ اتالاتىن كۋرستار قاۋلاپ تاراپ جاتقانىن جەتكىزدى.
"بۇل باعىت ءوزىن "ادامنىڭ ىشكى الەۋەتىن اشاتىن ساندىق پسيحولوگيا" دەپ تانىستىرعانىمەن، ءىس جۇزىندە عىلىمي نەگىزى جوق، ەزوتەريكالىق جانە ءدىني سيپاتتاعى كوممەرسيالىق جوباعا اينالىپ وتىر. بۇگىندە "سيۋساي" اتاۋىن جامىلعان توپتار جابىق فورماتتاعى شارالار وتكىزىپ،ءوز ۋاعىزدارىن كەڭىنەن تاراتىپ ءجۇر. ولاردىڭ باسىم بولىگى – ليسەنزياسىز، سەرتيفيكاتسىز، تىركەلمەگەن تۇلعالار.
جالعان ءىلىمنىڭ باستى ماقساتى – ازاماتتاردى "رۋحاني دامۋ" ۇرانىمەن يلاندىرىپ، ساندار مەن سيمۆولدارعا سۇيەنگەن پسيەۆدوتەوريا ارقىلى ماتەريالدىق پايدا تابۋ. كوپتەگەن ادام، اسىرەسە، ايەلدەر مەن جاستار، قارجىلاي شىعىنعا ۇشىراپ، پسيحولوگيالىق تاۋەلدىلىككە ءتۇسىپ جاتىر، ال كەيبىرى وتباسىلىق جانە الەۋمەتتىك كۇيزەلىسكە تاپ بولىپ وتىر"، - دەدى ول.
