Kórmede Qytaidyń 45-ke jýyq eń úzdik ýniversiteti akademiialyq qyzmeti týraly aqparat berip, ǵylymi jetistikterimen bólisti. Sondai-aq bilim alýshy jastarǵa halyqaralyq baǵdarlamalar arqyly oqýǵa túsý múmkindikterin tanystyryp, qabyldaý erejelerin túsindirdi.
Kórmeniń ashylýyna QR Prezidentiniń keńesshisi Málik Otarbaev, QR ǵylym jáne joǵary bilim Vitse-ministri Darhan Ahmet-Zaki, Qytai stipendiialyq keńesi Bas hatshysynyń orynbasary Tian Lýlý, QHR-dyń Almatydaǵy bas konsýly Tszian Vei, Ál-Farabi atyndaǵy QazUÝ-dyń Basqarma Tóraǵasy – Rektory Janseiit Túimebaev, QazUÝ Direktorlar keńesiniń tóraǵasy Qairat Mámi, Qytai jáne Qazaqstan JOO-larynyń basshylary men bilim alýshy jastar qatysty.
QR Prezidentiniń keńesshisi Málik Otarbaev Memleket basshysy Qasym-Jomart Toqaevtyń quttyqtaýyn jetkizip, sharanyń tabysty ótýine tilektestik bildirdi. «Qazaqstan men Qytai memleketaralyq tyǵyz qarym-qatynas pen halyqaralyq bailanystyń jańa deńgeiine qadam basty.
Memleket basshysy aǵymdaǵy jyly Qytaiǵa eki ret resmi saparmen baryp, birqatar kelisimderge qol jetkizdi. Prezident óz sózinde atap ótkendei, búgingi tańda eki el arasynda yntymaqtastyqtyń altyn 30 jyldyǵy bastaldy.
Saýda-sattyq, munai-gaz, kólik-tranzit jáne joǵary tehnologiia salalaryndaǵy jan-jaqty yqpaldastyq artyp jatyr. Sonyń ishinde ǵylym jáne joǵary bilim salasynda birlesken investitsiialyq jobalar júzege asyrylýda», – dedi Málik Otarbaev.
Óz kezeginde Darhan Ahmet-Zaki QR ǵylym jáne joǵary bilim ministri Saiasat Nurbektiń quttyqtaý hatyn oqyp berdi. Quttyqtaý hatta: «Qazirgi tańda joǵary bilim berý salasynda Qytai men Qazaqstan seriktestigi tarihi múmkindikterge, keń jáne keleshegi zor jobalarǵa toly. Búgingi qara shańyraq QazUÝ-da ótip jatqan kórme osynyń aiqyn kórinisi. Uiymdastyrylǵan kórme ǵylym men bilim berýdi damytýda da úlken mańyzǵa ie. Sondai-aq qos memleket arasynda stýdentter almasýǵa, tájiribemen bólisýge múmkindik beredi», – delingen.
Jiynda Ál-Farabi atyndaǵy QazUÝ-dyń Basqarma Tóraǵasy – Rektory Janseiit Túimebaev sóz sóilep, Qytai ýniversitetteri kórmesiniń QazUÝ-da ótýi Qazaqstannyń bilim, ǵylym salasyndaǵy eleýli oqiǵa ekenin atap ótti. «Qazirgi tańda QazUÝ Qytaidyń 51 joǵary oqý ornymen seriktestik ornatyp, tyǵyz jumys isteýde.
Memleket basshysy Qasym-Jomart Toqaevtyń Qytaiǵa resmi sapary aiasynda oqý ordasynda Soltústik-batys politehnikalyq ýniversitetiniń filialyn ashý jóninde kelisimge qol jetkizildi. Aǵymdaǵy jyldyń qazan aiynda atalǵan filial ashylyp, jumysyn bastady.
Maqsat – ǵylymi baǵytta birlesip zertteý jumystaryn júrgizý, stýdent daiarlaý jáne oqytýshylar almasý. QazUÝ Qytai ýniversitetterimen bailanysty jandandyrýǵa jáne nyǵaitýǵa baǵyttalǵan barlyq jumystardy jalǵastyra beredi», – dedi rektor Janseiit Qanseiituly.
Shara barysynda Stipendiialyq keńesi Bas hatshysynyń orynbasary Tian Lýlý Qytai JOO-larynyń sońǵy onjyldyqtaǵy jetistikterin tanystyrdy. «Bilim men ǵylym órkendese, el órkendeidi.
Sońǵy jyldardaǵy kórsetkish boiynsha Qytai – jaratylystaný baǵyty boiynsha álemde kóshbasshy memleket. Sonymen qatar Qytai joǵary oqý oryndarynyń sapasy men bilim berý ádisteri burynǵy nátijelermen salystyrǵanda edeýir joǵarylady. Sheteldik stýdentterdi tartý boiynsha da Qytai aldyńǵy orynda tur», – dedi.
Kórmeniń ashylý saltanatynda QHR-dyń Almatydaǵy Bas konsýly Tszian Vei: «Kórme qazaq jastaryna halyqaralyq baǵdarlamalar arqyly Qytai ýniversitetterine oqýǵa túsýge jol ashady dep sanaimyn. Biyl «Bir beldeý – bir jol» bastamasyna 10 jyl tolyp otyr. Osy baǵdarlama negizinde Qazaqstan men Qytai seriktestigi damyp, túrli salalarda nátijeli jumystar atqaryldy.
Sonymen qatar Qytai ýniversitetiniń filialy Qazaqstanda alǵash ret ashylýy jáne Qytai ýniversitetteriniń kórmesi tuńǵysh ret Qazaqstanda ótýi tarihi oqiǵa dep esepteimin», – dedi.
Jiyn sońynda qatysýshylar kórmeni aralap, Qytai men Qazaqstan delegatsiiasy shaǵyn quramda kelissóz júrgizdi. Taraptar seriktestikti nyǵaitýǵa, bilim men ǵylym salasyndaǵy bailanystardy tereńdetýge basa mán bere otyryp, eki el ýniversitetteri arasyndaǵy qarym-qatynastyń qazirgi jai-kúii men damý perspektivasyn jan-jaqty talqylady.
Ál-Farabi atyndaǵy QazUÝ-dyń Baspasóz qyzmeti
