Abai oblysynyń ákimi Berik Ýáli «Samuryq-Energo» AQ basqarma tóraǵasy Qairat Maqsutovpen kezdesti. Kezdesýde Semei qalasynda úshinshi jylý elektr ortalyǵyn salý jobasy talqylandy,- dep habarlaidy Dalanews.kz.
Joba aiasynda «Taza kómir» tehnologiiasyn qoldanatyn, elektr qýaty 360 MVt, jylý qýaty 1000 Gkal bolatyn jańa stantsiia salý josparlanyp otyr. Qazirgi tańda jer telimderi rásimdelip, tehnikalyq sharttar alynǵan. Eskizdik jobasy da kelisilgen.
Jalpy, Semei qalasynda qazirgi tańda jylý energiiasynyń tapshylyǵy 147 Gkal/saǵ qurap otyr. Bul jańa kópqabatty úiler men áleýmettik nysandardyń qurylysyna kedergi keltirýde. Al jaz ailarynda qala turǵyndary ystyq sýmen qamtylmai otyr.
«Prezidenttiń tapsyrmasymen Semei qalasynda salynatyn úshinshi jylý elektr ortalyǵy Úkimettiń qadaǵalaýyndaǵy másele. Oblys ortalyǵynyń oń jaǵalaýynda jylý tapshylyǵy bar. Osyǵan bailanysty eskirgen ári tiimsiz qazandyqtardy jabý, qazirgi jylý energiiasy tapshylyǵyn joiý, sondai-aq jańa energiia qýattaryn qurý máselesi airyqsha mańyzǵa ie. Oblys ákimdigi óz tarapynan JEO-3 qurylysyn ýaqtyly ári sapaly iske asyrý úshin jan-jaqty qoldaý men kómek kórsetýge daiyn», - dedi aimaq basshysy.
