Premer-ministrdiń birinshi orynbasary Roman Skliar Túrkiialyq jáne qazaqstandyq biznesmender qaýymdastyǵynyń (TÝKIB) basshylyǵymen jáne múshelerimen kezdesý ótkizdi. Onda biznesti júrgizý jáne investitsiialyq jobalardy júzege asyrýǵa qatysty ózekti máseleler, sondai-aq odan arǵy yntymaqtastyqtyń perspektivalary talqylandy, dep habarlaidy Dalanews.kz.
Roman Skliar Qazaqstan men Túrkiia arasyndaǵy qarym-qatynastar strategiialyq basymdyqqa ie ekenin atap ótti. Onyń aitýynsha, Túrkiia – Qazaqstannyń negizgi seriktesteriniń biri, al túrik investitsiialary tehnologiialar transfertine, ónerkásiptiń damýyna jáne jumys oryndarynyń ashylýyna zor yqpal etýde.
Óz kezeginde TÝKIB Basqarma keńesiniń tóraǵasy Abbas Shahin qaýymdastyq Qazaqstan men Túrkiia arasyndaǵy saýda-ekonomikalyq bailanystardy nyǵaitýǵa jáne Qazaqstan aýmaǵynda júzege asyrylyp jatqan birlesken jobalardy qoldaýǵa belsendi túrde úles qosa beretinin jetkizdi.
Kezdesý qorytyndysy boiynsha taraptar biznes júrgizý jaǵdailaryn jaqsartý jáne jańa jobalardy júzege asyrý boiynsha konstrýktivti dialog pen birlesken jumysty jalǵastyra berýge daiyn ekenderin bildirdi.
Aita keteiik, Túrkiialyq jáne qazaqstandyq biznesmender qaýymdastyǵy (TÝKIB) 2016 jyly qurylǵan jáne eki eldiń iri kompaniialaryn biriktiredi. Olardyń qatarynda: Alarko Holding, Anadolu Group (Efes Kazakhstan, Coca Cola), Aksa Energy, Borusan Kazakhstan, Esan Kazakhstan (Eczacibaşi Holding), Turkish Airlines, YDA Holding, TAV Kazakhstan, Corex Holding jáne basqalar bar. Qaýymdastyq Qazaqstan men Túrkiia arasyndaǵy saýda-ekonomikalyq bailanystardy damytýǵa jáne investitsiialyq klimatty jaqsartýǵa yqpal etedi.
