Memleket basshysy Básekelestikti qorǵaý jáne damytý agenttiginiń tóraǵasy Marat Omarovty qabyldady,- dep habarlaidy Dalanews.kz.
Prezidentke "Ekonomikany yryqtandyrý jónindegi sharalar týraly" jarlyqty iske asyrý maqsatynda atqarylǵan jumys nátijesi baiandaldy.
Agenttik tóraǵasy memlekettiń ekonomikadaǵy úlesin azaitý úshin 450-den asa kásiporyndy qamtityn tizim daiyndalǵanyn jetkizdi. Ulttyq jekeshelendirý keńsesi ázirlegen tizimdegi kompaniialardy básekelestik ortaǵa berý usynylady.
Marat Omarovtyń aitýynsha, negizgi taýarlar naryǵyndaǵy básekelestikti damytý jumystary aiasynda birjalyq qyzmet zańnama talaptary men qazirgi naryqtyq saýda jaǵdailaryna sáikestendirilgen. Búgingi tańda 3 taýar birjasy jumys isteidi, al agenttikke osy saladaǵy memlekettik baqylaý fýnktsiialary berilgen sátte 22 birja bolǵan edi.
Sondai-aq, Memleket basshysyna vedomstvonyń aldaǵy kezeńge arnalǵan jumys jospary tanystyryldy.
Kezdesý sońynda Prezident ekonomikanyń basty sektorlaryndaǵy básekelestikti damytýǵa, vedomstvo júrgizip jatqan tergeýler men tekserýlerge, sondai-aq shaǵyn jáne orta biznesti qorǵaýǵa bailanysty birqatar tapsyrma berdi.
