Alaida, «Lavrentevtiń artynda «Severstal» tur» degen jalǵan málimet te taralyp úlgerdi. Bul qaýesetti shyǵaryp, oǵan qarsy aqparattyq soǵys jariialaǵan biznes ókilderiniń de aty-jóni belgili.
Aita ketý kerek, Mittalmen kelissóz uzaq ýaqytqa sozyldy. Óitkeni, áý bastan britandyq alpaýyt aktivter úshin 3,5 milliard dollar suraǵan. Qazirgi ýaqytta mámile qorytyndysy kelesidei kórinis tapty.
Lavrentev aktiv úshin 286 million dollar tólese, taǵy oǵan qosymsha 250 million dollar Mittaldyń qaryzyn jabady. Munymen qosa merdigerler aldyndaǵy bereshek te óteledi dep kútilýde.
Nátijesinde kelisimsharttyń tranzaktsiia somasy 3,5 milliard dollardan 286 million dollarǵa deiin qysqardy.
Biraq Lavrentev mámilege eshbir «kókeni» nemese reseilikterdi tartpaǵany málim. Onyń óz betimen tapqan qarajaty bolashaqta eshqandai sanktsiialyq táýekelge ilikpeitini de aityldy. Sondai-aq, kásipker jańa kompaniianyń aktivteri ornalasqan qalalardaǵy áleýmettik nysandarǵa investitsiia salýǵa ýáde berip otyr.
Bir qyzyǵy, bázbir insaiderler tranzaktsiia somasynyń 3,5 milliard dollardan 286 million dollarǵa deiin tómendeýin Mittalǵa tikelei tólenetin tólemmen túsindiredi. 3,5 mlrd dollar qaidan shyqty deseńiz, Nazarbaev alǵashqyda óziniń kóleńkeli aktivterin qolma-qol aqshaǵa ainaldyrý úshin «seriktesine» qysym jasap, baǵany tómendetpeýdi talap etken.
Buǵan deiin birqatar aqparat quraldary marqum Rahat Álievtiń kitabyndaǵy: "Nazarbaev Mittalmen kelisim aiasynda Temirtaýdaǵy zaýyttyń 50 paiyz aktsiiasy men 50 mln dollarǵa ie boldy. Kásiporyn úndi oligarhyna sý teginge keldi..." degen úzindisin taratqan.
Infliatsiiany esepke alar bolsaq, Mittal sonaý 1995 jyly aktivti satyp alýǵa jumsaǵan qarjysyn ǵana keri qaitardy, oǵan odan artyq "úles" berilgen joq. Bul jerde utylyp otyrǵan bir adam bar. Ol búginde Qaraǵandy kásiporyndar tobyna esh qatysy joq eks-prezident qana.
Al jańa investor Lavrentev 286 million dollardan basqa ArcelorMittal bas kompaniiasyna eki nesie tóleidi: 250 million dollar kóleminde qysqa merzimdi nesie jáne 4 jyldan astam ýaqyt óteitin 450 million dollar kólemindegi uzaq merzimdi nesie.
Budan bólek, QARMET-ti jańǵyrtýǵa 3 milliard dollar investitsiialaýy kerek, sonymen qatar shtat deńgeiin ustap turý jáne barlyq aǵymdaǵy mindettemelerdi oryndaýdy mindetine aldy. Bir sózben aitqanda, avtomagnat táýekelge bel býyp, orasan zor jaýapkershilikti moinyna júktep otyr.
