Qyrǵyzstanda Kólbaevtyń uiymdasqan qylmystyq tobymen bailanysy bar dep kúdiktelgen qazaqstandyq izdeýge jariialandy, dep habarlaidy Dalanews.kz.
Qazaqstan azamaty Kamalýtin Halikov Qamchybek Asanbektiń, kópshilikke Qamchy Kólbaev atymen belgili, uiymdasqan qylmystyq tobyn qarjylandyrdy degen kúdikke ilindi.
Arnaiy qyzmettiń dereginshe, Halikov Qaraǵandy oblysynyń boks federatsiiasyn basqarady, qurylys salasynda aktivteri bar. Buǵan deiin ol Qazaqstanda qylmystyq top uiymdastyrǵany jáne Qyrǵyzstannan taýardy kontrabandalyq jolmen tasymaldaǵany úshin qylmystyq jaýapkershilikke tartylǵan.
Tergeý nusqasyna sáikes, Halikov Qamchybek Kólbaevtyń kisi óltirý, adam urlaý jáne qylmystyq uiymdy basqarý boiynsha birneshe ret sottalǵanyn bile tura, onymen bailanysqa ádeii shyqqan. Bul áriptestik oǵan Qyrǵyzstanda «qorǵan» alý jáne birlesken biznes-jobalardy júzege asyrý úshin qajet bolǵan.
Quzyrly organdardyń málimetinshe, Halikov Kólbaevpen Ystyqkól oblysyndaǵy «Bars» demalys ornynda birneshe ret kezdesken.
Bishkektiń Oktiabr aýdandyq soty Halikovqa syrttai qamaýǵa alý túrindegi bultartpaý sharasyn tańdady. Osyǵan bailanysty ol resmi túrde izdeýge jariialandy.
Qamchybek Asanbek (Qamchy Kólbaev) Qyrǵyzstanda «zańdaǵy ury» atanyp, Ortalyq Aziiadaǵy eń yqpaldy qylmystyq avtoritetterdiń biri sanalǵan. 2023 jyly Qyrǵyzstan Ishki ister ministrligi arnaiy operatsiia barysynda onyń kózin joiǵanyn habarlaǵan edi. Soǵan qaramastan, UQMK dereginshe, onyń qylmystyq toby áli de áreket etip, biznes pen memlekettik qurylymdarda bailanystaryn saqtap otyr.
