قىرعىزستاندا كولبايەۆتىڭ ۇيىمداسقان قىلمىستىق توبىمەن بايلانىسى بار دەپ كۇدىكتەلگەن قازاقستاندىق ىزدەۋگە جاريالاندى، دەپ حابارلايدى Dalanews.kz.
قازاقستان ازاماتى كامالۋتين حاليكوۆ قامچىبەك اسانبەكتىڭ، كوپشىلىككە قامچى كولبايەۆ اتىمەن بەلگىلى، ۇيىمداسقان قىلمىستىق توبىن قارجىلاندىردى دەگەن كۇدىككە ءىلىندى.
ارنايى قىزمەتتىڭ دەرەگىنشە، حاليكوۆ قاراعاندى وبلىسىنىڭ بوكس فەدەراسياسىن باسقارادى، قۇرىلىس سالاسىندا اكتيۆتەرى بار. بۇعان دەيىن ول قازاقستاندا قىلمىستىق توپ ۇيىمداستىرعانى جانە قىرعىزستاننان تاۋاردى كونتراباندالىق جولمەن تاسىمالداعانى ءۇشىن قىلمىستىق جاۋاپكەرشىلىككە تارتىلعان.
تەرگەۋ نۇسقاسىنا سايكەس، حاليكوۆ قامچىبەك كولبايەۆتىڭ كىسى ءولتىرۋ، ادام ۇرلاۋ جانە قىلمىستىق ۇيىمدى باسقارۋ بويىنشا بىرنەشە رەت سوتتالعانىن بىلە تۇرا، ونىمەن بايلانىسقا ادەيى شىققان. بۇل ارىپتەستىك وعان قىرعىزستاندا «قورعان» الۋ جانە بىرلەسكەن بيزنەس-جوبالاردى جۇزەگە اسىرۋ ءۇشىن قاجەت بولعان.
قۇزىرلى ورگانداردىڭ مالىمەتىنشە، حاليكوۆ كولبايەۆپەن ىستىقكول وبلىسىنداعى «بارس» دەمالىس ورنىندا بىرنەشە رەت كەزدەسكەن.
بىشكەكتىڭ وكتيابر اۋداندىق سوتى حاليكوۆقا سىرتتاي قاماۋعا الۋ تۇرىندەگى بۇلتارتپاۋ شاراسىن تاڭدادى. وسىعان بايلانىستى ول رەسمي تۇردە ىزدەۋگە جاريالاندى.
قامچىبەك اسانبەك (قامچى كولبايەۆ) قىرعىزستاندا «زاڭداعى ۇرى» اتانىپ، ورتالىق ازياداعى ەڭ ىقپالدى قىلمىستىق اۆتوريتەتتەردىڭ ءبىرى سانالعان. 2023 جىلى قىرعىزستان ىشكى ىستەر مينيسترلىگى ارنايى وپەراسيا بارىسىندا ونىڭ كوزىن جويعانىن حابارلاعان ەدى. سوعان قاراماستان، ۇقمك دەرەگىنشە، ونىڭ قىلمىستىق توبى ءالى دە ارەكەت ەتىپ، بيزنەس پەن مەملەكەتتىك قۇرىلىمداردا بايلانىستارىن ساقتاپ وتىر.
