Sondyqtan ońtaıly ózgerister oryn alýy úshin tájirıbeli jáne ózindik jańa kózqarasy qalyptasqan jańa býyn ókilderin tartý qajet, degen jazba paıda boldy QR Bilim jáne ǵylym mınıstri Ashat Aımaǵambetovtyń paraqshasynda, dep habarlaıdy Dalanews.kz.
Ózderińiz biletindeı, el Prezıdenti jastardy memleketti basqarý isine tartý máselesine kóp kóńil bóledi. Máselen, Jastar kadrlyq rezervin qalyptastyrý, memlekettik qyzmetti reformalaý jáne Memleket basshysynyń basqa da bastamalary qolǵa alyndy. Biz Prezıdenttiń saıasatyn, sonyń ishinde bilim berý júıesine jańa kóshbasshylardy tartý boıynsha jumystardy jalǵastyryp kelemiz. Jańa kóshbasshylar - óz elin, jerin súıetin patrıottardan quralǵan jas urpaq. Kóbiniń halyqaralyq tájirıbesi bar, olar - kásibı ortada keńinen tanymal jáne maman retinde qalyptasqan tulǵalar.
Taǵaıyndalǵan basshylardyń basym bóligi "Bolashaq" baǵdarlamasynyń túlekteri jáne álemniń úzdik joǵary oqý oryndarynda bilim alǵan bolsa, endi bir bóligi Nazarbaev Ýnıversıtetinde oqyǵan nemese jumys istegen mamandar.
Tek sońǵy úsh aıdyń ishinde Abaı atyndaǵy QazUPÝ, Qoja Ahmet Iasaýı atyndaǵy qazaq-túrik ýnıversıteti, Qyzdar ulttyq ýnıversıteti, Sátbaev Ýnıversıteti, Qozybaev Ýnıversıteti sıaqty jetekshi joǵary oqý oryndarynyń rektorlary bolyp zor áleýeti men mol tájirıbesi bar kóshbasshylar taǵaıyndaldy.
Bul rette adamı kapıtaldy damytý jónindegi memlekettik saıasatty ázirleý jáne iske asyrý kezinde jergilikti jerlerdegi jaǵdaıdy neǵurlym sapaly jáne tolyq eskerý úshin biz óńirlerde qyzmet atqaryp jatqan mamandardy jumysqa belsendi túrde tartýǵa tyrysamyz.
Jas kóshbasshylar óz bilimi men tájirıbesin elimizdiń gúldenýi jolynda paıdalanyp, eńbek úlesterin qosqylary keledi. Olardyń árqaısysyna úlken úmit artylyp otyr.
Memleket basshysy Q.K.Toqaevtyń saıasatyn júzege asyrý jónindegi jumystyń basy-qasynda da osy mamandar júrýi tıis.
Aıtpaqshy, jańa kóshbasshylar demekshi, bizdiń kózdegenimiz - jańa mamandardy jumysqa tarta otyryp, qyzmette júrgen basshylardy tolyǵymen aýystyrý saıasatyn júrgizý emes.
Bizdiń basty maqsatymyz - qazaqstandyq bilim men ǵylymnyń áleýetin barynsha kúsheıtý úshin "jastyq pen tájirıbeniń úılesim tabýyn" qamtamasyz etý.
Jańa kózqarasy bar jas kadrlardy jumysqa qabyldaı otyryp, tepe-teńdik pen urpaqtar sabaqtastyǵy saqtalatyn bolady. Mınıstrlik tarapynan iske asyrylyp jatqan kadrlyq saıasat týraly qoǵamda neǵurlym tolyq jáne obektıvti túsinik qalyptastyrý maqsatynda aldaǵy birneshe aptanyń ishinde jańadan taǵaıyndalǵan basshylar kishigirim suhbat beredi.
Suhbat barysynda jas kóshbasshylar basqaryp otyrǵan uıymdaryn odan ári damytý boıynsha jumys josparyn (1), júzege asyrylatyn negizgi reformalar (2), jumys josparyn iske asyrý úshin júıege tartylatyn resýrstar (3) jáne jańa basshynyń taǵaıyndalýynan bastap uıymnyń aldaǵy ýaqytqa josparlanǵan jumys nátıjelerimen (4) bólisetin bolady.
Sonymen qatar bul jumysty júıeli túrde jalǵastyrý úshin jaqyn arada biz jańa joba bastaıtyn bolamyz.
Atap aıtsam, "Kadrlyq rezerv" jobasy. Biz bilim jáne ǵylym júıesinde basshylyq laýazymǵa usyný úshin tabysty ári daıyndyǵy myqty úmitkerlerdi irikteýdi josparlap otyrmyz.
Joba boıynsha irikteý sharttary men tártibi týraly aqparat jeke jarıalanady.
Budan bólek jaqyn arada bizdiń bastamamyzben júzege asyrylatyn dırektorlardy rotasıalaý ınstıtýty, olardy taǵaıyndaýdyń jańa qaǵıdalary jáne muǵalimderdi jumysqa konkýrs arqyly qabyldaýdyń jańa júıesin engizetin normalar júzege asyryla bastaıdy.
Oıymdy qorytyndylaı kele, Mınıstrlik bilim men ǵylym salasyndaǵy kadrlyq áleýetti nyǵaıtý jáne odan ári damytý máselelerine basty nazar aýdaratynyn atap ótkim keledi. Bul mańyzdy baǵyt bizdiń aldaǵy jumysymyzda da basymdyqqa ıe bolatyny sózsiz, delingen jazbada.
Tóńkeristiń túkke qajeti joq
Budan buryn Dalanews-ke suhbat bergen mınıstr Aımaǵambetov «bilim salasyna úlken reformalardyń qajeti joq» degen edi.
«Mysaly, bireý jańa mınıstr keldi, endi ol osy saladaǵy burynǵy qatelikterdi túzep, bárin keńestik júıege qaıta baǵyttaıdy dep úmittenedi. Al taǵy bireýi, kerisinshe: qoldanystaǵy osy júıeni – jańartylǵan baǵdarlamany qaldyrady, eshteńeni ózgertpeıdi dep oılaıdy.
Men osy qyzmetke jańadan taǵaıyndala salysymen, barlyq sarapshy mamandarmen jolyǵyp, tildestim. Bilim mınıstrligin synaýshylarmen de, sol sekildi qoldaýshylarmen de.
Maǵan olardyń ustanymy túsinikti. Árqıly pikirler, kóbine bir-birine qarama-qaıshy.
Olardyń bir bóligi Fınlándıa sıaqty elderdiń ozyq baǵdarlamalaryn qolǵa alyp, engizý óte qajet dep sanaıdy, al basqalary 1980 jylǵy bilim berý baǵdarlamalaryna qaıta oralsaq deıdi.
Qalaı degenmen de úlken ózgeris bolmaıdy dep aıtyp qoıaıyn. Kóbine mınıstr jańadan kelgende: «Meniń aldymdaǵylar bárin durys jasamaǵan, sondyqtan bárin qaıta qarastyryp, qaıta basqasyn engizemiz» deıdi emes pe? Negizinen, bul saıasatty men qoldamaımyn. Men olaı etpeımin.
Árıne, aldyńǵyny qabyldap alamyz, solaı bolýy kerek.
Biraq men bilim berý salasynda jumys istep, bul júıeni árqyrynan baıqap kórgen adammyn. Aýdanda da boldym, oblysta da boldym… Sonyń arqasynda mınıstr retinde maǵan sheshimder qabyldaý áldeqaıda ońaıyraq.
Qoǵam kóterip otyrǵan kóptegen problemalardy sheshý úshin úlken reformalardyń qajeti joq. Tóńkeristiń túkke qajeti joq.
Eń kúrdeli degen, jandy jerge tıetin reformalar júzege asyrylyp qoıylǵan, endigi problemalardy kezeń-kezeńimen aqyryndap esh aýyrtpalyqsyz sheshýge bolady», – degen bolatyn mınıstr.
