@NRG_monitor esebinshe, Qashaǵanda ashylǵaly beri óndirilgen munai kólemi 105 million tonnany quraidy. Bul aqshalai eseptegende 65 milliard dollar bolady (barreline $85 baǵamen).
Al Qazaqstan nege investorlardan 138 milliard dollar talap etýde?
2008 jyly Qashaǵan boiynsha Ónimdi bólý kelisimine (SRP) ózgerister engizilip, sol jyly Qashaǵandy igerý jospary men biýdjetine túzetýler bekitildi. Onda boljamdyq shyǵyndar 57 milliard dollardan 136 milliard dollarǵa deiin ósip, óndiristik keste 2008 jyldan 2010 jylǵa jyljytyldy.
Onyń esesine jobadaǵy Qazmunaigaz úlesi 8,33-ten 16,81%-ǵa ósti, sondai-aq respýblika paidasyna qosymsha aqshalai tólemder (roialti) qosyldy. Olar munai baǵasyna bailanysty 3,5%-12,5% aralyǵynda tólenýi tiis edi. Munai baǵasy 85 dollar/barrel bolyp turǵanda bizge kelýi tiis ótemaqy somasy 71 milliard dollarǵa baǵalandy.
Eń bastysy, kezinde investorlar Qashaǵandaǵy munaidy kezeń-kezeńimen igerýge jáne óndirýdi arttyrýǵa ýáde bergen edi. Munai neǵurlym kóp bolsa, respýblikanyń úlesi soǵurlym tezirek tólenedi. Demek, Qazaqstan investorlardyń Qashaǵandy igerýdi jyldan-jylǵa keiinge qaldyrýynan úlken soma joǵaltty.
