Abai oblysy Úrjar aýdanyna qarasty Besterek aýylynda alty balany qaǵyp ketken jol-kólik oqiǵasyna qatysty sot protsesi jalǵasyp jatyr. Sotta kólik júrgizýshisi sońǵy sózin sóiledi, dep habarlaidy Dalanews.kz.
Ol qaza tapqan jáne zardap shekken balalardyń ata-analarynan keshirim surady.
"Men jasaǵan qylmysty tolyq moiyndaimyn jáne onyń búkil jaýapkershiligin óz moinyma alamyn. Barlyǵyńyzdan keshirim suraimyn. Mundai qaiǵy eshkimniń basyna týmasyn", — dedi aiyptalýshy.
Eske salaiyq, buǵan deiin prokýror balalardy qaǵyp ketken júrgizýshini 9,5 jylǵa sottaýdy surady.
Kezekti sot otyrysynda memlekettik aiyptaýshy aiyptalýshyǵa 9 jyl 6 ai merzimge bas bostandyǵynan aiyrý jazasyn taǵaiyndaýdy surady.
Buǵan deiin prokýror sotta jańartylǵan aiyptaý aktisin usynǵan. Onda aiyptalýshynyń kinásin tolyq moiyndaýy jeńildetetin mán-jai retinde kórsetilgen. Al qylmystyń kámeletke tolmaǵandarǵa qatysty jasalýy jaýapkershilikti aýyrlatatyn jaǵdai retinde baǵalanǵan.
Aita keteiik, 19 tamyzda Abai oblysynyń Úrjar aýdanynda 55 jastaǵy júrgizýshi úidiń qaqpasy mańynda oinap júrgen alty balany kólikpen qaǵyp ketken edi. Sol sátte úsheýi - eki, bes jáne segiz jastaǵy balalar oqiǵa ornynda qaza tapty. Sondai-aq 6-9 jas aralyǵyndaǵy taǵy úsh bala jaraqat aldy.
Kólik júrgizýshisi eki aiǵa qamaýǵa alyndy. Onyń týystarynyń aitýynsha, apatqa júrek talmasy sebep bolǵan.
Aita keteiik, buǵan deiin Astana qalalyq Densaýlyq saqtaý basqarmasynyń baspasóz qyzmeti zardap shekken eki bala aýrýhanadan shyqqany týraly málimdegen edi.
