Shyǵys Qazaqstan oblysynda kásipker Anatolii Balýshkinge tiesili bolǵan "Nurtaý" taý shańǵy kýrorty satylymǵa shyǵaryldy, dep habarlaidy Dalanews.kz.
Kýrorttyń jyljymaly jáne jyljymaityn múlikterin, onyń ishinde ǵimarattar, jer ýchaskeleri men nysandaryn qosa alǵanda naryqtaǵy quny 11,8 mlrd teńge dep baǵalandy. Saýda formaty boiynsha nysan memlekettik zańdy tulǵalardyń balansynda bekitilip, is júzinde tegin berilýi qarastyrylǵan.
Qazirgi ýaqytta kýrort Shyǵys Qazaqstan oblysy Memlekettik múlik jáne jekeshelendirý departamentiniń balansynda tirkelgen.
Balýshkin isi
Eske sala keteiik, 2025 jylǵy sáýirde Qazaqstan soty asa iri kólemdegi alaiaqtyq pen salyq tóleýden jaltarý isi boiynsha Anatolii Balýshkindi syrttai 9 jylǵa, al Erik Saǵymbaevty 8 jyl 6 aiǵa bas bostandyǵynan aiyrý týraly úkim shyǵarǵan edi.
Qylmystyq is aiasynda sotqa aldyn ala tárkileý týraly ótinish joldanyp, onda "Rahmanovskie kliýchi", "Nurtaý" jáne "Port Fortýna" siiaqty 77 jyljymaityn múlik nysandary qamtyldy.
Aiyptaý nusqasyna sai, Balýshkin men "Aziia Avtonyń" bas direktory Erik Saǵymbaev bankten alynǵan nesieler men salyqty tólemeý maqsatynda 230 mlrd teńge qarjyny jymqyrǵan. Bul qarajat avtomobilderdi ónerkásiptik qurastyrý zaýytyn salýǵa arnalǵan bolatyn. Balýshkin 2021 jyldyń tamyzynan bastap halyqaralyq izdeýde.
2025 jyldyń naýryzynda sot "Aziia Avtonyń" taǵy segiz top-menedjerine úkim shyǵardy. Olar alaiaqtyq, qarjy jymqyrý jáne salyqtan jaltarý baptarymen aiyptaldy. Eki adam aqtaldy. "Alaiaqtyq" baby keiin "Aldaý nemese senimdi teris paidalaný arqyly múliktik ziian keltirý" babyna aýystyryldy. Sottalǵandarǵa 2,5 jyldan 2 jyl 8 aiǵa deiin bas bostandyǵynan aiyrý jazasy taǵaiyndaldy. Alaida, olardyń tergeý izoliatorynda jáne úiqamaqta ótkizgen ýaqyty eskerilip, jazalary ótelgen dep tanyldy.
Atalǵan atyshýly is boiynsha jábirlenýshiler retinde Jusan Bank jáne Qazaqstannyń Indýstriia jáne infraqurylymdyq damý ministrligi (qazirgi — Indýstriia jáne qurylys ministrligi) tanylǵan.
Al kúzde Resei "Aziia-Avto" avtomobil zaýytynyń eks-top-menedjerleri Anatolii Balýshkin men Erik Saǵymbaevty Qazaqstanǵa qaitarýǵa kelispei otyrǵany belgili boldy.
Qazaqstan Bas prokýratýrasynyń túsindirýinshe, basqa elde júrgen Resei azamattaryna qatysty qazaqstandyq sottardyń shyǵarǵan úkimderin Resei aýmaǵynda moiyndaý jáne oryndaý tártibi 2002 jylǵy 7 qazandaǵy «Azamattyq, otbasylyq jáne qylmystyq ister boiynsha quqyqtyq kómek týraly» konventsiiamen retteledi. Osy kelisimge súiene otyryp, Qazaqstan tarapy Reseige Balýshkin men Saǵymbaev jónindegi sot sheshimin taný jáne oryndaý týraly birneshe ret ótinish joldaǵan. Alaida Reseidiń ádilet ministrligi bul suraýlardy qanaǵattandyrmaǵan.
Bas prokýratýra muny Reseidiń atalǵan konventsiiany ratifikatsiialaý kezinde óz azamattaryna qatysty shetel sottary shyǵarǵan úkimderdi taný jáne oryndaýǵa mindetteitin 109-bapty qoldanbaý týraly arnaiy eskertpe qaldyrýymen túsindirdi.
Sonymen birge vedomstvo Balýshkin men Saǵymbaevtyń izdeýden alynbaǵanyn málimdedi. Sondyqtan olar basqa memlekette tabylyp, ustalǵan jaǵdaida, olardy ekstraditsiialaý baǵytyndaǵy jumystar jalǵasady.
