Qostanaı oblysy Lısakovsk qalasyndaǵy mektepterdiń birinde oqýshy sabaq ústinde boqtyq sózder aıtqany úshin anasy ákimshilik jaýapkershilikke tartyldy. Bul týraly Qostanaı oblystyq sotynyń baspasóz qyzmeti málimdedi, dep habarlaıdy Dalanews.kz.
Oqıǵa 10 jeltoqsanda bolǵan. 2011 jyly týǵan oqýshy sabaq kezinde muǵalim men synyptastarynyń kózinshe boqtyq sózder aıtqan. Atalǵan fakti boıynsha balanyń anasyna qatysty “usaq buzaqylyq” babymen ákimshilik is qozǵaldy.
Sot otyrysy barysynda áıel kinásin tolyq moıyndap, jasaǵan isine ókinish bildirdi. Onyń aıtýynsha, balamen túsindirý jumystary júrgizilgen, ol muǵalimnen keshirim suraǵan.
Sot sheshimimen áıelge 19 267 teńge mólsherinde aıyppul salyndy.
