Ekonomikalyq jáne sybailas jemqorlyqqa qarsy kúres agenttiginiń (EQSJQA, burynǵy qarjy politsiiasy) burynǵy tergeýshisi, bir kezderi vedomstvonyń eks-basshysy bolǵan Qairat Qojamjarovtyń komandasynda jumys istegen Jandos Árip "Qorǵas isiniń" materialdaryn qoldan jasaǵany úshin sottaldy, dep habarlaidy Dalanews.kz Elmedia telegram arnasyna silteme jasap.
"Búgin "kezekti Qojamjarovqa" qatysty shyǵarylǵan úkim belgili boldy. Qarjy politsiiasynyń burynǵy tergeýshisi Jandos Árip (sýrette sol jaqta) “Qorǵas isine”, anyǵynda onyń “ashylýyna” qatysty qujattardy qoldan jasaǵany úshin kináli dep tanyldy. Bul isti biz “Horgos” jańa ashylyp jatqan kezde-aq kótergenbiz.
Qysqasha aitqanda, 2011–2012 jyldary Árip EQSJQA-ǵa qyzmetke jańadan qabyldanǵannan keiin az ýaqyt ótpei jatyp, UQK-niń joǵary laýazymdy qyzmetkerleri — Talǵat Jaqaev pen Erlan Ábdirahmanovty qylmystyq jaýapkershilikke tartýǵa negiz bolatyn dáleldemelerdi jinaýmen shuǵyl ainalysty. Tergeýshi, úlken yqtimaldyqpen, basshylyqtyń (Maqsat Dúisenovtiń) tikelei tapsyrmasyn oryndap, Almatydaǵy meiramhanalardyń birinde túsirilgen beinejazbalardy qoldan jasap, onda uiymdasqan toptyń “jetekshisi”, syrtqy ekonomikalyq qyzmetpen ainalysqan kásipker Talǵat Qaiyrbaevtyń komitet qyzmetkerlerimen kezdesti dep kórsetken", — delingen dúisenbi kúngi habarlamada.
Alaida "beinejazbada múlde basqa adamdar bolǵany anyqtaldy, ony ózderi de rastady".
"Sonymen qatar billing derekteri men issapar qujattaryna sáikes, ol kezde Jaqaev pen Ábdirahmanov Almatyda bolmaǵan. Soǵan qaramastan, qarjy politseileri áshkereleýge qaramai, óz ustanymynan bas tartpady. “Kontrabandashylardyń UQK qyzmetkerlerimen bailanysy bar” degen aqparat prezident Nazarbaevqa deiin jetkizilip, BAQ-qa taratyldy. Atap aitqanda, “Benditskii saǵaty” baǵdarlamasynda dál osy beinekadrlar kórsetilip, ondaǵy adamdardyń komitetshiler ekeni aityldy. Sol fakt UQK ofitserlerin ustaý jáne qamaýǵa alý úshin negiz boldy — olar “QTB kezdesýinde” basty kontrabandashyǵa qandai-da bir qupiia málimetterdi bergen-mys.
Budan bólek, Jaqaev pen Abdrahmanov ol jerde bolmaǵany belgili bolǵannan keiin de, sottar tergeý organdarynyń ótinishteri boiynsha olardyń qamaýda ustaý merzimin qaita-qaita uzartty. Bul protsesti sol kezde qarjy politsiiasynyń tergeý departamentin basqarǵan, al búginde áli de Almaty prokýrorynyń orynbasary bolyp otyrǵan Nurlan Aýǵanbaev tikelei qadaǵalady", — dep jazady basylym.
Elmedia-nyń málimetinshe, 2023 jyly Bas prokýratýranyń vedomstvoaralyq jedel-tergeý toby sotqa deiingi tergep-tekserý júrgizýdi bastaǵan, al is biyl jyldyń basynda sotqa jetken.
"Alaida №2 Medeý aýdandyq sotynyń sýdiasy Jomart Muhambetjan aldyn ala tyńdaýlardyń ózinde-aq “ókilettikterdiń óreskel protsessýaldyq buzylýyna” qatysty qorǵaý tarapynyń ótinishin kúmándi túrde jyldam qoldap, isti qosymsha tergeýge prokýratýraǵa qaitaryp jiberdi. Keiin is tamyz aiynda qaitadan sotqa, ári taǵy da sol Muhambetjanǵa tústi - jáne búgin ol aiyptaý úkimin shyǵardy. Aita keteiik, Jandos Aryp naqty jaza almady - is raqymshylyq merziminiń ótýine bailanysty toqtatyldy", - delingen habarlamada.
Sonymen birge basylymnyń jazýynsha, "bul jerde eń mańyzdysy — úkimniń ózi", óitkeni ol "Horgos isin" qaita qaraýǵa taǵy bir quqyqtyq múmkindik beredi".
"Taǵy bir múmkindik deitinimiz — buǵan deiin osy iske qatysy bar Áriptiń basqa da burynǵy áriptesteri dáleldemelerdi qoldan jasaý jáne figýranttarǵa azap kórsetý faktileri úshin sottalǵan bolatyn. Budan bólek, tizbek baiaý bolsa da, “Qorǵastyń” basty benefitsiaryna — sol kezdegi EQSJQA tóraǵasy Qairat Qojamjarovqa qarai jetelep barady.
Sondyqtan biz kóktemde boljaǵanymyzdai, Áriptiń isi (qarjy politsiiasynyń pogony bar taǵy birqatar “áriptesteriniń” isteri siiaqty) sottarda ázirge belgisiz “qojamjarovshylardyń” kómegimen tejelip keldi. Jalpy, búgingi úkimdi jyldar boiy ádildik izdegender úshin jaman emes jańa jyldyq syilyq deýge bolady", — dep qorytyndylaidy jýrnalister.
