SHQO-da qara sózdiń zergeri Qalıhan Ysqaqovtyń 90 jyldyq mereıtoıyna arnalǵan respýblıkalyq aqyndar aıtysy máresine jetti, - dep habarlaıdy Dalanews.kz
Elimizdiń túkpir-túkpirinen kelgen on eki aqyn sóz saıystyrǵan jyr básekesiniń ekinshi aınalymyna qarsylastarynan joǵary upaı alǵan Serik Qýanǵan, Aspanbek Shuǵataev, Rústem Qaıyrtaıuly, Jansaıa Mýsına, Birjan Baıtýov jáne Iranǵaıyp Kúzembaev syndy aýzymen qus tistegen júırik aqyndar bir jarym saǵat boıy ózara sóz saıystyryp, «kim myqtyny» anyqtady.
Aıtys barysynda ashshy da tushshy taqyryptar, oryndy ázil-qaljyń men eldik máseleler qozǵalyp, kórermenniń qoldaýyna ıe boldy.
Oblys ortalyǵynda araǵa on jyl salyp qaıta uıymdastyrylǵan aıtys – ultymyzdyń erekshe óneri retinde saǵynǵan halyqtyń aıyzyn qandyrdy. Qazylar alqasynyń biraýyzdy sheshimimen alty saǵatqa sozylǵan jyr básekesiniń bas júldesin taıaýda ǵana Tarazdan bas júldemen oralǵan jerlesimiz, talantty aqyn Serik Qýanǵan qanjyǵasyna baılady.
Aıtystyń bas júldesin Shyǵys Qazaqstan oblysynyń ákimi Nurymbet Saqtaǵanov ózi tabystap, aıtysty jarty kúnnen astam tapjylmaı tyńdaǵan kórermenge, sóz marjanyn sapyrǵan aqyndarǵa, aıtysqa arnaıy kelgen aqyn Júrsin Erman men depýtat Amanjol Áltaevqa, sondaı-aq ózge de qazylar alqasyna rızashylyǵyn bildirdi.
"Búgin Shyǵysymyzda sán-saltanaty jarasqan keremet kesh ótti. Aıtys óneriniń jankúıerleri - sizderge, ot aýyz, oraq tildi, sáıgúlikteı júzden júırik shyqqan, búgin baǵy janyp, baby kelip turǵan aıtyskerlerge - basymyzdy ıip úlken rahmetimizdi aıtamyz. Buıyrtsa, Qalıhan Ysqaq esiminiń qurmetine arnalǵan is-sharalar legi jazda respýblıkalyq deńgeıde Katonqaraǵaıda da jalǵasyn tabady. Qara sózdiń has sheberi bolǵan aǵamyzdyń ónegeli ómiri – bolashaq urpaqqa úlgi. Sondyqtan osyndaı rýhanı is-sharalar jalǵasyn tabýy tıis. Qazaqtyń aıtysy barda, rýhymyz berik, bolashaǵymyz aıqyn!",- dedi aımaq basshysy.
Júldeli birinshi orynǵa aqtyq saıysta Serik Qýanǵanmen sóz talastyrǵan talantty aqyn, semeılik Rústem Qaıyrtaıuly laıyq dep tanylsa, júldeli ekinshi oryndy qyzylordalyq Iranǵaıyp Kúzembaev pen pavlodarlyq Aspanbek Shuǵataev ózara bólisti.
Úshinshi oryn oraldyq Jansaıa Mýsına men ońtústikten kelgen Birjan Baıtýovqa buıyrdy.
Aıtysqa úles qosqan ózge aqyndardyń barlyǵyna el atynan qomaqty syı-sıapat kórsetildi.
