Almatynyń ındýstrıaldy aımaǵynda Almaty Autoparts Production jańa zaýytynyń ashylý saltanaty ótti,- dep habarlaıdy Dalanews.kz Ónerkásip jáne qurylys mınıstrligine silteme jasap.
«Almaty Autoparts Production» ashylý saltanaty QR Ónerkásip jáne qurylys mınıstrligi Ónerkásip komıtetiniń tóraǵasy Azamat Panbaev, «Youngsan» kompanıasynyń tóraǵasy Pak Chon Bom jáne «Astana Motors» kompanıasynyń negizin qalaýshy Nurlan Smaǵulovtyń qatysýymen ótti.
Qazaqstandyq «Astana Motors» kompanıasy men «Youngsan» avtokomponentter óndirýshisi (Koreıa Respýblıkasy) Almatynyń Indýstrıaldy aımaǵynda avtokólik oryndyqtaryn shyǵaratyn birlesken kásipornyn iske qosty. Lokalızasıanyń birinshi kezeńinde ortaq ınvestısıa kólemi 4 mlrd teńgeni qurady.
2024 jyldyń jeltoqsan aıynda kompanıa oryndyqtarǵa arnalǵan kóbikti qalyp-pishinderdiń synama partıasyn shyǵaryp, sertıfıkasıadan ótip, ónimderdi Hyundai jeńil avtokólikter óndirisine jetkizý maqsatynda «Hyundai Motor Company» (Koreıa Respýblıkasy) kelisimin aldy.
Halyqaralyq standart talaptary men qyzmetkerlerdiń biliktilik deńgeıiniń sáıkestigi rastalǵan soń, kásiporyn oryndyqtardy óndirý boıynsha tehnologıalyq operasıalardy júzege asyrý maqsatynda memleketpen kelisimge otyrdy.
«Prezıdent el ekonomıkasyn damytýdaǵy jeke ınvestorlardyń mańyzdy róline toqtap, kásiporyndarǵa jumys oryndaryn saqtaý jáne óndiristi jańǵyrtý boıynsha kóńilge qonymdy mindettemeler júktelýi tıis ekenin atap ótti. Biz moınymyzǵa alǵan mindetterimiz aldyndaǵy jaýapkershilikti tolyqtaı sezinemiz. Osy maqsatta syrtqy faktorlarǵa táýeldilikti azaıtý, avtokólik ónerkásibinde bilikti ınjenerler býynyn daıyndaý, sonymen birge shaǵyn jáne orta bıznesti damytýǵa járdemdesý úshin avtokomponentter men shıkizat óńdeýdiń qomaqty úlesin lokalızasıalaýǵa qaraı baǵyt alyp kelemiz», – dedi «Astana Motors» bas dırektory Beknur Nesipbaev.
«Almaty Autoparts Production» óndiris qýaty jylyna 100 myń oryndyq jınaǵyn quraıdy. Joba «Hyundai Trans Kazakhstan» zaýytynda usaq túıindi óndirisi arqyly Hyundai Tucson modeline arnalǵan oryndyqtardy shyǵarýdy bastady. Jaqyn arada zaýyt Hyundai Santa Fe modeline arnalǵan oryndyqtardy óndiredi.
«Biz «Astana Motors» pen «Youngsan» arasyndaǵy bekem baılanysqa negizdelgen bastamalarymyzdyń nátıjesin kórip otyrmyz. Bul tek alǵashqy qadam ǵana. Álemde jáne TMD aımaǵyndaǵy avtokólik ónerkásibindegi qarqyndy ózgeristerdi eskere otyryp, biz osy baǵytta únemi jumys isteıtin bolamyz», – atap ótti «Youngsan» tóraǵasy Pak Chon Bom.
Bolashaqta Kásiporyn óz ónimderin jańa «Astana Motors Manufacturing Kazakhstan» mýltıbrendti zaýytyna, sondaı-aq basqa da avtokólik kásiporyndaryna jetkizýdi josparlap otyr.
«Almaty Autoparts Production» kásipornynyń mamandary kóbikti qalyp-pishinderdi óndirýdiń tehnologıalyq operasıalaryn meńgerdi. 2026 jyly zaýyt jetkiziletin shıkizattan oryndyq qaptamasyn tigý boıynsha lokalızasıanyń ekinshi kezeńine shyǵady. Kásiporyn tigin sehyn ashyp, ony jabdyqtaýǵa jáne kadrlardy oqytýǵa qosymsha 720 mıllıon teńge ınvestısıa jumsaýdy kózdep otyr.
