7 naýryz kúni Almaty áýejaiynda oryn alǵan oqiǵa eldi dúr silkindirdi. Jolaýshylardy tekserý aimaǵynda belgisiz er adam inspektordy kepilge alyp, pyshaqpen qorqytqan. Alaida batyl azamattyń jedel áreketi jaǵdaidy baqylaýǵa alýǵa kómektesti, dep habarlaidy Dalanews.kz.
Belgili bolǵandai, qylmyskerdi ustaýǵa kómektesken – Musa Sairambaiuly Ábdiraiymov. Ol 1973 jyly Túrkistan oblysy, Túlkibas aýdany, Kúmisbastaý aýylynda dúniege kelgen. Kásibi sportpen ainalysqan, búginde bes balanyń ákesi. Sonymen qatar ánshi Baǵlan Ábdiraiymovtyń aǵasy.
“Eshkim batyr bolamyn, qaharman bolamyn dep josparmen júrmesi anyq. Der kezinde durys sheshim qabyldap, ómirińizdi tapsyra salǵanyńyz erlik”, — dep jazdy ánshi Baǵlan Ábdiraiymov.
Oqiǵa kýágerleri Musa Ábdiraiymovtyń erligine tánti boldy. Ol qaýipke qaramastan, qylmyskerdiń pyshaǵyn tartyp alyp, áýejai qyzmetkerin qutqarǵan. Áleýmettik jelide “bul – naǵyz erlik” degen pikirler kóbeiip, onyń batyldyǵy keńinen talqylanýda.
Memleket basshysy Qasym-Jomart Toqaev Musa Abdraimovtyń batyldyǵyn erekshe atap ótip, ony memlekettik marapatqa usynýdy tapsyrdy. Bul týraly Prezidenttiń baspasóz hatshysy Rýslan Jeldibai habarlady.
“Prezident qylmyskerdiń sýyq qarýyn tartyp alyp, ustaýǵa kómektesken er adamnyń batyldyǵyn erekshe atap ótip, atalǵan azamatty memlekettik nagradaǵa usynýdy tapsyrdy” dedi baspasóz hatshysy.
Kozachkov telegram-arnasynyń jazýynsha, ol politsiia qyzmetkeri emes – oqiǵa ornyna kezdeisoq tap bolǵan jáne [qyzmetkerdi bosatyp], ózin kepildikke alýdy usynǵan. Videoda onyń pyshaqty úshkir jaǵynan jyldam tartyp alǵany kórinedi.
Eske salaiyq, buǵan deiin Almatyda er adam áýejai qyzmetkerin kepilge alǵanyn jazǵan edik.
Áýejai ókilderiniń sózinshe, oqiǵa búgin, 7 naýryzda áýejaidyń ushý aldyndaǵy tekserý aimaǵynda bolǵan.
Saǵat 11:45 shamasynda ózin jolaýshy retinde tanystyrǵan er adam ishki terminaldaǵy (T1) reis aldyndaǵy tekserý aimaǵyna kelgen. Almaty halyqaralyq áýejaiynyń aviatsiialyq qaýipsizdik qyzmetiniń skrining qyzmetkerleri er adamnan qujattaryn kórsetýdi suraǵan, biraq er adam skrining ofitserin shashynan ustap alyp, pyshaqpen qorqyta bastaǵan.
7 minýttan keiin áýejaidyń jelilik politsiia bóliminiń (LPD) qyzmetkerleri jáne Almaty halyqaralyq áýejaiynyń aviatsiialyq qaýipsizdik qyzmetkerleri er adamnyń pyshaǵyn tartyp alǵan.
Qazirgi ýaqytta er adam politsiia bóliminde, quqyq qorǵaý qyzmetkerleri oqiǵanyń mán-jaiyn anyqtap jatyr.
