«Aýylda densaýlyq saqtaýdy jańǵyrtý» ulttyq pilottyq jobasy aiasynda Jetisai aýdanynda qurylysy júrgizilgen 6 meditsinalyq-sanitariialyq alǵashqy kómek berý nysandarynyń taǵy bireýi el igiligine tapsyryldy,- dep habarlaidy Dalanews.kz
Maqtaly aýyldyq okrýginiń ortalyǵynda boi kótergen dárigerlik ambýlatoriiada 5 dáriger men 60-qa jýyq orta meditsina qyzmetkerleri 8 myń turǵynǵa qyzmet kórsetetin bolady.
Densaýlyq saqtaý nysanynyń saltanatty ashylýyna Jetisai aýdanynyń ákimi Serik Mamytov pen aýdandyq máslihat tóraǵasy Medet Qasymov qatysyp, aýyl turǵyndaryn aitýly qýanyshtarymen quttyqtady. Densaýlyq saqtaý nysanynyń aýyl turǵyndarynyń ómir súrý sapasyn arttyryp, densaýlyǵyn jaqsartýǵa múmkindik beretinine senim bildirdi. Bilikti kadrlarmen jáne zamanaýi meditsinalyq qural-jabdyqtarmen qamtamasyz etilgenin, meditsinalyq nysannyń elge kómek kórsetýge tolyq daiyn ekenin aitty.
Lenta qiiý rásiminen keiin qonaqtar nysandy aralyp kórip, ondaǵy zamanaýi úlgidegi áielderdi qarap-tekserý, ekpe egý, profilaktikalyq qaraý, durys tamaqtaný mektebi, deni saý bala, sterilizatsiia, qaqyryq jinaý, turmystyq sharýashylyq jáne dárihana bólmeleriniń jumysymen tanysty.
Aita keteiik, búginde Asyqata óńirinde 82 myń turǵyn esepke alynsa, onyń 17200-i týý jasyndaǵy áielder, 31653-i balalar. Óńir turǵyndaryna 1200-den astam meditsina mamandary sapaly qyzmet kórsetip keledi.
Buǵan deiin de aýdandyq «Asyqata» ortalyq aýrýhanasyna qarasty eldi mekenderde «Aýylda densaýlyq saqtaýdy jańǵyrtý» ulttyq pilottyq jobasy aiasynda jańadan 3 feldsherlik-akýsherlik pýnkt qoldanysqa berilgen bolatyn.
