Túrkistan oblysynda "Taza Qazaqstan" baǵdarlamasy aiasynda josparlanǵan 7263 tazalyq is-sharasynyń alǵashqylary bastaldy. Bul týraly Túrkistan oblysynyń ákimi Nuralhan Kósherovtyń tóraǵalyǵymen ótken apparat májilisinde aityldy,- dep habarlaidy Dalanews.kz
Jinalysta oblys ákiminiń birinshi orynbasary Zulpyhar Joldasov baǵdarlama aiasynda atqarylyp jatqan jumystar men kóktemgi aǵash egý jáne kógaldandyrý jumystary boiynsha baiandady. Onyń aitýynsha, «Taza Qazaqstan» baǵdarlamasy turaqty qadaǵalaýda, sondai-aq, arnaiy tehnika alý jumystary da baqylaýǵa alyndy.
Qazirgi tańda «TazaQazBot» aqparattyq júiesine 1 527 ótinim túsken. Onyń ishinde, 1 505 ótinim oryndalǵan, 22 ótinim oryndalý barysynda. Sondai-aq biyl qoǵamdyq oryndarda sanitarlyq talaptaryn saqtamaǵan tulǵalarǵa 4487 hattama toltyrylǵan. Memlekettik kommýnaldyq kásiporyndarǵa qatty turmystyq qaldyqtardy jinaý jáne shyǵarý máselesi boiynsha barlyq aýdan, qala ákimdikteri jarǵylaryna tolyqtai ózgerister engizdi. Endigi kezekte, 262 eldi mekende qatty turmystyq qaldyqtaryn jinaý boiynsha jáne sanitarlyq tazalyq jumystaryn júrgizý boiynsha tiisti is-sharalar uiymdastyrylady.
Túrkistan oblysynda kóktemgi aǵash egý, kógaldandyrý jáne tazalaý is-sharasy júrgizilip jatyr. Atalǵan sharaǵa 17 aýdan men qalalardan jalpy alǵanda, 129 672 turǵyn belsendilik tanytyp, óz qalalary men aýyldaryn tazartýǵa úles qosty. Qala men aýyl kóshelerin tazalaýǵa 739 arnaiy tehnika jumyldyryldy. Nátijesinde 201 375 kóshet otyrǵyzylyp, 2 709 tonna qoqys shyǵaryldy.
Jalpy, biyl 1,2 mln. aǵash otyrǵyzý josparlanǵan. Onyń ishinde 631 túp aǵashty kóktem mezgilinde otyrǵyzý josparlanýda. Jalpy bul jumystar 25 aqpannan bastalǵan. Búgingi tańǵa aýdan, qala aýmaǵynda 201 375 túp aǵash otyrǵyzylyp, sý júielerimen qamtamasyz etilip, qorshaý jumystary júrgizilýde.
Oblys ákimi Nuralhan Kósherov Memleket basshysynyń «Taza Qazaqstan» baǵdarlamasy aiasynda jumystardy kúsheitýdi jáne kóktemgi aǵash egý jumystaryn ýaqtyly ári sapaly júzege asyrýdy tapsyrdy.
