Almaty oblysynda Ulystyń uly kúni – Naýryz meıramyna oraı keń aýqymdy merekelik sharalar ótedi. Turǵyndar men qonaqtar úshin teatrlandyrylǵan qoıylymdar, ulttyq oıyndar, konsertter men erekshe mádenı performanstar uıymdastyrylady,- dep habarlaıdy Dalanews.kz
"Naýryz – bul tek halyqtyq meıram ǵana emes, bul – jańarý men birliktiń, urpaqtar sabaqtastyǵynyń sımvoly. Biz bul meıramdy óńir turǵyndary men qonaqtary úshin erekshe ári este qalarlyqtaı etýge bar kúshimizdi salamyz", - dep atap ótti Almaty oblysy ákiminiń birinshi orynbasary Nurlan Ábdirahym.
Dástúrler onkúndigi: ár kúnniń óz máni bar
Bıyl Naýryz meıramy on kúnge sozylatyn erekshe marafon formatynda ótedi. Ár kúnniń ózindik taqyryby men mazmuny bar:
- 14 naýryz – Kórisý kúni (tatýlyq pen birliktiń sımvoly);
- 15 naýryz – Qaıyrymdylyq kúni;
- 16 naýryz – Mádenıet pen dástúr kúni;
- 17 naýryz – Otbasy jáne urpaqtar sabaqtastyǵy kúni;
- 19 naýryz – Jańarý kúni;
- 20 naýryz – Ulttyq sport kúni;
- 21 naýryz – Birlik kúni;
- 22 naýryz – Jyl basy (Naýryz merekesiniń basty kúni);
- 23 naýryz – Tazalyq kúni.
Jalpy óńirde 368 merekelik is-shara josparlanǵan, olar barlyq aýdandarda ótedi.
Naýryzdyń basty merekelik alańdary
Merekeniń negizgi toılanatyn úsh basty orny anyqtaldy:
🔸 Ortalyq alań – munda 25 qazaqy kıiz úı tigilip, qonaqtar ulttyq salt-dástúrlermen tanysa alady. Kelýshilerge qazaqtyń dástúrli taǵamdary usynylyp, al basty sahnada Qazaqstan estrada juldyzdarynyń konserti ótedi.
🔸 Qonaev kóshesi – bul alańda qolóner sheberleriniń sheberlik sabaqtary, ulttyq taǵamdar jármeńkesi men qoldanbaly óner kórmesi uıymdastyrylady.
🔸 B. Soqpaqbaev atyndaǵy qalalyq park – munda qazaqsha kúres, asyq atý, gir tasyn kóterý sıaqty ulttyq oıyndar ótedi. Sondaı-aq, qonaqtar úshin arnaıy fotozonalar, anımatorlar men balalarǵa arnalǵan oıyn-saýyq baǵdarlamasy ázirlengen.
2025 jylǵy Naýryzdyń basty oqıǵalary
- Qydyr ata beınesindegi teatrlandyrylǵan kórinis, tazartý rásimderi jáne dástúrli naýryzkóje taratý.
- 100 dombyrashy qazaq kúı óneriniń maıtalmany Nurǵısa Tilendıevtiń 100 jyldyǵyna arnap kúı oryndaıdy.
- Qazaqstandyq estrada juldyzdarynyń konserti jáne jastarǵa arnalǵan Open Air ashyq aspan astyndaǵy merekelik shara.
Naýryz – jańarýdyń, meıirimdiliktiń, ulttyq rýhtyń merekesi. Almaty oblysy barlyq turǵyndar men qonaqtardy osy aıtýly merekeni birge toılaýǵa shaqyrady.
