Qairat Satybaldynyń zaiyby Gúlmira Satybaldy jaiynda áńgime qozǵarda onyń Nazarbaev áýletin arqalanyp, áldekimderdiń tabysty biznesin tartyp alǵan áreketi birden eske túsdi. Ádette Nazarbaev otbasy músheleri bizneste tabysty jumys istep, úlken bailyqqa kenelgendi jón sanaidy. Olardyń qai-qaisysynyń biografiiasyna kóz salsańyz, týa bitti kásipkerlik qabiletke ie me dep tańqalasyń.
Al Gúlmira hanymnyń 2009-2015 jyldary BUU-nyń Niý-Iorktegi 6 jylǵa sozylǵan diplomatiialyq qyzmeti jaiynda kópshilik bile bermeidi dep jazady Dalanews.kz.
Ǵalamtordaǵy ashyq aqparat kózderinen Gúlmira Satybaldynyń negizgi mamandyǵy ustaz ekenin bilýge bolady. Ókinishke qarai, ǵalamtordan onyń qai mektepte jumys istegenin tabý múmkin bolmady.
Esesine, onyń reiderlik áreketpen ainalysyp, kásipkerlerdi qan qaqsatqany jaily aqparat tolyp tur.
Endi negizgi áńgimemizge kóshsek. 2009 jyly Gúlekeń Qazaqstannyń BUU-daǵy ókildiginde úshinshi hatshy bolyp, diplomatiia salasyndaǵy mansabyn bastaidy.
Bul kisi de qaiynaǵasy Bolat Nazarbaev aitqandai, "áýlettiń tegin paidalanbastan" ózine tapsyrylǵan jumysty tabysty atqaryp, bar bolǵany eki jylda birinshi hatshy statýsyna ie bolǵan. Biraq Gúlmira hanymdy qoǵam bilikti diplomat dep esh ýaqytta tanyǵan emes.
Osy rette "ol Niý-Iorktegi dipqyzmetinde qandai máselemen ainalysty?" degen suraq týyndaidy.
Árine, Gúlmira hanymnyń saiasi-ekonomikalyq máselelermen ainalyspaǵynyn ishińiz sezip otyrǵan shyǵar. Mundai kúrdeli ispen ainalysýǵa ol kisiniń óresi jetpesi anyq.
Gúlekeń Qazaqstannyń BUU-daǵy ókildiginde qyzmet atqarǵan tusta mádeniet salasyna jaýapty bolǵan. Alaida otbasynyń "pysyq kelini" Niý-Iorktegi 6 jyldyq qyzmetinde qazaq mádenietin álemge qalai nasihattaǵanyn eshqandai diplomat aityp bere almaidy. Jalpy, pedagog mamandyǵyn meńgergen kelinniń aýyz toltyryp aitatyndai is atqarmaǵanyn ishińiz sezip otyrǵan shyǵar.
BUU-daǵy ókildikte tutastai eldiń mádeni qundylyqtaryn nasihattaý ońai sharýa emes. Mundai jaýapty qyzmetti atqarý úshin úlken is-tájiribe qajet. Mundai bilik pen bilim Nazarbaevtar áýletiniń kelininde qaidan bolsyn?
Gúlekeńde jaýapty qyzmetke qabyldarda onyń diplomatiialyq is-tájiribesine eshkim qarap jatpasa kerek.
Bizge belgili bolǵandai Gúlekeń Qazaqstannyń BUU-daǵy ókildiginde elimizdegi diplomattardyń júikesin jún qylǵan.
Gúlmira hanymnyń nelikten dipqyzmetke ańsary aýyp, qyzyǵa qaldy degen suraq týyndaidy. Onyń ózindik sebepteri bar.
Qazaqstannyń BUU-daǵy ókildiginde jumys istegen qyzmetkerlerge memleket tarapynan birqatar jaily jaǵdai men jeńildikter usynylady. Shamasy Gúlekeń Niý-Iorkte turyp, osy igilikterge qol jetkizýdi kóksese kerek.
Memleket BUU-daǵy ókildiginde jumys istegen diplomattardyń turǵyn úi jaldaý shyǵynyn, balalarynyń mekteptegi oqý aqysyn tólep beretini belgili.
Eń mańyzdysy halyqaralyq uiymda jumys istegen qyzmetkerlerdiń ústinen qylmystyq is qozǵap, túrmege toǵytýǵa qarsy immýnitet bar (Gúlekeńdi osy múmkindik qatty qyzyqtyrýy múmkin).
Budan basqa dipqyzmette júrgen mundai adamdar birqatar salyqtan bosatylady (Gúlekeń úshin bul da mańyzdy bolǵany anyq).
Osydan-aq Gúlmira hanymnyń diplomat bolýǵa nelikten ańsary aýǵanyn baiqaýǵan shyǵarsyz.
Ol Qazaqstannyń BUU-daǵy ókildigine jumysqa turǵanda eldiń mádenietin damytýdan buryn dipqyzmettiń igilikterine qol jetkizýdi kózdegen.
Gúlmira hanym Qazaqstannyń BUU-daǵy ókildiginde tabany kúrektei 6 jyl jumys istegende Qazaqstannyń mádenietin álemge tanytty degen áńgimeni eshkim estimegeni anyq. Qańtar oqiǵasy bolmaǵanda Gúlmira hanym Qazaqstannyń Batys elderindegi bir elshisi bolyp keter me edi?..
